Ташкент 2022 жүдо бөхийн дэлхийн аварга шалгаруулах тэмцээний хувийн барилдаан өнөөдөр явагдаж өндөрлөнө. Маргааш багийн барилдаан болж энэ удаагийн дэлхийн аварга хөшгөө хаана. Манай улсын жүдочид энэ удаагийн дэлхийн аваргад амжилттай өрсөлдөж байна. Эрэгтэйчүүдийн 73 кг-ын жинд ОУХМ Ц.Цогбаатар алтан медаль, 60 кг-д ОУХМ Э.Ариунболд мөнгөн медаль, эмэгтэйчүүдийн 57 кг-ын жинд ОУХМ Л.Энхрийлэн хүрэл медаль хүртсэн амжилт үзүүлээд байгаа.

  Өнөөдөр тэмцээний сүүлийн өдөр +100 кг-ын жинд залуу тамирчин гран слам, гран при тэмцээний алт, мөнгө, хүрэл медальт, ОУХМ О.Цэцэнцэнгэл хүч үзнэ. Тус жингийн  гол фаворит нь олимпын мөнгөн медальт, дэлхийн аварга, Гүржийн Guram Tushishvili , манай О.Цэцэнцэнгэл, олимпын хошой , дэлхийн хошой аварга, Чехийн Lukas Krpalek, Японы залуу од Tatsuru Saito нар байна. Тэдэнтэй гол өрсөлдөөнийг Узбекистаны Temur Rakhimov, Украины Y.Khammo, Нидерландын Jur Spijkers, олимп, дэлхийн аварын мөнгө, хүрэл медальт, Бразилийн R.Silva, дэлхийн аваргын мөнгөн медальт Кубын Andy Granda, дэлхийн аваргын хүрэл медальт Азербайжаны U.Kokauri нар хийх болно.