Узбекистан Улсын нийслэл Ташкент хотод жүдо бөхийн дэлхийн аварга шалгаруулах тэмцээн амжилттай үргэлжилж байна. Эрэгтэйчүүдийн 35, эмэгтэйчүүдийн 26 дахь удаагийн жүдо бөхийн насанд хүрэгчдийн дэлхийн аварга шалгаруулах тэмцээнд 82 орны эмэгтэй 261, эрэгтэй 310 нийт 571 тамирчин өрсөлдөхөөр эцсийн байдлаар мэдүүлгээ өгсөн билээ. 

Манай улсаас эрэгтэй, эмэгтэй тус бүр ес, нийт 18 жүдоч зодоглож байна. Жүдо бөхийн 2022 оны дэлхийн аваргын гурав дахь өдрийн барилдаанууд өнөөдөр болно. Тэмцээний гурав дахь өдөр эрэгтэйчүүдийн 73 кг болон эмэгтэйчүүдийн 57 кг-ын жингийн жүдочид татамид зодоглоно. Монгол Улсаа төлөөлөн Ц.Цогтбаатар, М.Ичинхорлоо, Л.Энхрийлэн нар өрсөлдөх юм.

Ц.Цогтбаатар 73 кг-ын жингийн эхний тойрогтоо гоц мөргөн ялалт авсан. Тэрбээр хоёрдугаар тойрогтоо Израилийн Идо Левин болон Саудын Арабын Сулайман Хамад нарын аль ялсантай барилдана.

Эмэгтэйчүүдийн 57 кг-ын жинд М.Ичинхорлоо нэгдүгээр тойрогтоо Бразилын Жессика Лиматай учраа таарчээ. Хэрэв ялвал Доминиканы Ана Розатай барилдана. Л.Энхрийлэн эхний тойрогтоо гоц мөргөн ялалт авсан. Тэрбээр дараагийн тойрогтоо Муна Дахук болон Кристианне Легентил нарын ялсантай барилдана. Манай улс хоёр дахь өдрийн байдлаар нэг мөнгөн, нэг тавдугаар байртай, багийн дүнгээр 82 орноос хоёрдугаар байрт бичигдэж байна.