Биеийн тамир, спортын улсын хорооны дарга Д.Жаргалсайхан, тус хорооны ХШҮДАХ-ийн дарга Н.Батсүх, СХОХ-ийн барилга хариуцсан мэргэжилтэн Д.Энхээ нарын бүрэлдэхүүнтэй ажлын хэсэг есдүгээр сарын 29-нд Ховд аймагт ажиллав. Тус аймгийн Ховд хот болон Мянгад, Зэрэг, Дарви сумдад баригдаж байгаа болон шинээр ашиглалтад орсон спортын барилга, байгууламжтай танилцав.

     Энэ үеэр БТСУХ-ны төлөөлөгчид Ховд аймгийн Засаг дарга Э.Болормаатай ажлын уулзалт хийж, аймгийн төвд байрлалтай усан спортын төвийг аймгийн иргэд, олон нийтэд нээлттэй, хүртээмжтэй ашиглах талаар ярилцав. Мөн аймгийн спортын ордны их засварыг хийх, мэргэжлийн хяналтын байгууллагын дүгнэлт гарсан хуучин спорт заалны асуудлыг цаашид хэрхэх зэрэг асуудлыг ярилцлаа.

  Үүнээс гадна иргэдийн эрүүл, зөв амьдралын хэв маягийг хэвшүүлэх зорилготой орон нутгийн онцлогт суурилсан (брэнд) нийтийн биеийн тамир, спортын төрөл, арга хэмжээг хөгжүүлэх санал, төлөвлөгөөний талаар ярилцав. БТСУХ-ны төлөөлөгчид тус аймгийн Биеийн тамир, спортын газарт очин тус байгууллагын дарга, удирдлага, ажилтнуудтай уулзан зохих мэдээллийг авч ажилласан юм.