Белград-2022 дэлхийн аварга шалгаруулах тэмцээний чөлөөт бөхийн эрэгтэйчүүдийн төрөл өнөөдрөөс эхэлж байна. Өнөөдөр 70, 79, 86, 125 кг-ын жингийн урьдчилсан болон хагас шигшээ барилдаан болно.

    Манай бөхчүүдээс 70 кг-ын жинд залуучуудын ДАШТ-ий хүрэл медальт, “U23”-ын Азийн аварга ОУХМ Э.Тэмүүлэн чангахан сугалаа татжээ. Тэрбээр тэгшитгэлд энэ жил Италид болсон чансааны оноо олгох тэмцээнд түрүүлсэн Азербайжаны Жошгун Азимовтой барилдахаар болов. Түүнийг ялсан тохиолдолд ДАШТ-ий алт, хошой хүрэл медальт Гүржийн Зураби Якобишвилитэй учраа таарна.

    Харин 79 кг-д энэ жилийн улсын аваргад түрүүлж Белградад зорих эрхээ авсан, спортын мастер А.Дөлгөөн 16-гийн нэгд үлдэх барилдаанд Хонконгийн Энди Кабейя Мукендитай барилдана. Түүнийг ялбал шөвгийн наймд үлдэх эрхийн төлөө Румыний Якуб Шихжамалов, Ираны Мохаммад Ноходи нарын ялсантай хүч үзэх юм.

     Залуучуудын ДАШТ-ий хүрэл медальт ОУХМ Б.Бат-Эрдэнэ 86 кг-д хүч үзнэ. Тэрбээр Молдавын Иван Ичизлитэй оноолт таарав. Түүнийг ялбал шөвгийн 16-д манай бөхийг олимпын алт, мөнгөн медальт, дэлхийн гурван удаагийн аварга, Ираны алдарт бөх Хасан Яздани Черати хүлээж байна.

     Харин 125 кг-д “U23” болон насанд хүрэгчдийн ДАШТ-ий хүрэл медальт ОУХМ М.Лхагвагэрэл дэлхийн чансааны дөрөвдүгээр бичигдсэн тул эхлээд гоц мөргөж наймны нэг шигшээд Сербийн Дагестан легионер Магомедгажи Нурасулов, 2019 онд Нур-Султаны дэлхийн аваргад хүрэл зүүсэн ч дараа нь допингийн улмаас медалиа хураалгасан Узбекистаны Хасанбой Рахимов нарын ялсантай барилдана. Энэ даваанд давбал шөвгийн наймд Казахстаны Олег Болтинтэй, хагас шигшээд Гүржийн Гено Петриашвилитэй таарах магадлалтай.