Польш Улсын Краков хотноо маргааш есдүгээр сарын 8-ны өдөр жүдо бөхийн мастеруудын дэлхийн аварга шалгаруулах тэмцээн албан ёсоор эхэлнэ. Тус дэлхийн аварга энэ сарын 8-11-ний өдрүүдэд зохион байгуулагдах юм. Энэ удаагийн ДАШТ-д 59 орны 897 ахмад тамирчин өрсөлдөхөөр мэдүүлгээ өгөөд байна.

   Ахмад мастеруудын ДАШТ-д 30-аас дээш насныхан есөн насны ангилалд хуваагдан өрсөлддөг дүрэмтэй. Энэ удаагийн ДАШТ-д манай улсаас эрэгтэй 14, эмэгтэй найм буюу нийт 22 тамирчин өрсөлдөнө. Монголын багаас хамгийн залуу нь 32 настай Б.Мөнхсайхан эрэгтэйчүүдийн 81кг жинд өрсөлдөх бол хамгийн ахмад нь 62 настай С.Оюунбилэг эмэгтэйчүүдийн 63 кг-ын жинд өрсөлдөнө.