Өнөөдөр монголын спортын гимнастикийн тамирчин ОУХМ Ганбатын Эрдэнэболд залуучуудын олимпын наадмаас алтан медаль хүртсэн түүхэн өдөр.  Г.Эрдэнэболд 17 настайдаа "Сингапур~2010" залуучуудын анхдугаар олимпын наадамд харайлтын (Vault) төрөлд алтан медаль хүртэж байсан билээ.

    Тэрбээр олон төрөлтөд 37 дугаар байр эзэлсэн боловч , модон морин дээгүүр харайх төрөлд гал гарган , гайхалтай дүүлэн түрүүлж 15. 650 оноо авч , залуучуудын анхны олимпын аварга цол хүртсэн. Ийнхүү тэрбээр монголын спортын түүхэнд гимнастикийн анхны том ялалтыг эх орондоо авчирсан.  Г.Эрдэнэболд "Бээжин~2008" насанд хүрэгчдийн олимпод анх удаа аваргалсан Н.Түвшинбаяр, Э.Бадар-Ууган ах нарынхаа агуу амжилтыг буухиалсан авьяаслаг даруухан хүү юм.

    Түүнээс өмнө Налайхын охин , "Баавгай" хэмээх Баатарцогтын Батцэцэг "Сингапур~2010" залуучуудын олимпын наадмын чөлөөт бөхийн төрөлд алтан медаль хүртэж, ард түмнийхээ магнайг тэнийлгэсэн үе байв . Олимпын аварга Г.Эрдэнэболдын аав нь хөлбөмбөгийн мастер , "Хөдөлмөр" нийгэмлэгийн тамирчин Рагчаагийн Ганбат. Харин түүний дасгалжуулагч нь Спорт сургалтын төвийн багш , шигшээ багийн дасгалжуулагч, циркийн акробатчин "Сахал"  хэмээх Цэрэнсодномын Алтантөгс багш билээ.

    "Бөмбөөлэй" хэмээн өхөөрдөм "хочтой" Ганбатын Г.Эрдэнэболд мастер нь олимпын алт медаль хүртэхдээ Туркийн Ф.Арикан , Испанийн Н.Абад нартай шагналын тавцанд хөл тавьсан бөгөөд Бразил , Тайланд , Орос , Мексик , Украины гимнастикчид IV-VIII шигшээ байрт шалгарч байв.  Өдгөө олимпын аварга маань АНУ-ын Виржиния мужийн Фейрфакс хотноо суралцаж байгаа.