Үндэсний спортын VII наадмын үндэсний бөхийн барилдаанд улс, аймаг, сумын цолтой болон залуу бөхийн ангилалд өрнөв. Барилдаан тойргоор болж улсын цолтой бөхийн барилдаанд Өвөрхангай аймгийн харьяат, улсын харцага Б.Цэдэнсодном түрүүлсэн бол хоёрдугаар байранд Архангай аймгаас оролцогч улсын начин Ч.Ганзориг, гуравдугаар байранд Хан-Уул дүүргээс оролцогч улсын начин Б.Бадамсүрэн шалгарлаа.

  Харин аймгийн цолтой бөхийн ангилалд Өвөрхангай аймгаас оролцогч аймгийн харцага Б.Өлзийсайхан түрүүлж, дэд байранд Төв аймгаас оролцогч аймгийн харцага Л.Даваажамц, гуравдугаар байранд Өмнөговь аймгаас оролцогч аймгийн арслан Ц.Лувсан-Адъяа оров.

   Сумын цолтой бөхийн барилдаанд Орхон аймгаас оролцогч сумын заан А.Пүрэвсүрэн түрүүлж, Увс аймгаас оролцогч сумын заан Б.Цагаанбанди дэд байранд, гуравдугаар байранд Завхан аймгаас оролцогч сумын заан Д.Төгс-Эрдэнэ нар шалгарав. Харин залуу бөхийн барилдаанд Сүхбаатар аймгаас оролцогч Д.Бямба-Эрдэнэ түрүүлсэн бол Орхон аймгийн оролцогч Б.Цэрэндаш дэд байр, Чингэлтэй дүүргийн оролцогч З.Галт-Очир байранд шалгарч хүрэл медаль хүртлээ.