Нүүдэлчдийн өв соёлыг дэлхийд таниулах, соёлын биет бус өвөө уламжлуулан үлдээх 21 аймаг нийслэлийн 1432  өвлөн уламжлагч хамрагдах “Нүүдэлчин” дэлхийн соёлын фестиваль энэ сарын 12-нд горхи, тэрэлжид болно.

  Фестивалийн үеэр “Соёлын өвийн таван үндсэн өртөө”, “22 отог”-ийн 88 өргөө байх юм. Соёлын өвийн хүрээнд эх хэл, аман уламжлал илэрхийлэгчдийн өргөө, ардын язгуур урлаг, уламжлалт баяр наадам, зан үйл, ёс тоглоом наадгай, уриа дуудлагын, байгалийн болон сав шим ертөнцийн тухай мэдлэг, зан үйл, уламжлалт ухаан, мал маллах арга ухааны өргөөнүүд байрлах юм байна.

   Нүүдэлчин Монгол өв соёлоо үр хойч үедээ өвлүүлэн үлдээх соёлын фестивальд гэр бүлээрээ хүрэлцэн ирэхийг зохион байгуулагчид урьж байна. Монгол Улсын 21 аймаг, Улаанбаатар хотоос нэгэн цагт нэгдэн чуулж, нутаг нутгийнхаа өв соёлыг гайхан бишрүүлэхээр нүүдэллэн очно.

    “Гэр бүл, үр хүүхэдтэйгээ хамтдаа дэлхийд гайхагдах монгол өв соёлоо хамтдаа түгээцгээе” хэмээн уриалж байна. Тус фестивальд оролцогчид монгол үндэсний хувцас гоёлоо өмсөн ирж оролцох аж. Харин тус фестивальд Дархан-Уул аймгаас 39 соёлын биет бус өвийн  өвлөн уламжлагч нар оролцоно. Дархан-Уул аймгийн отог 20 дугаартай байх аж.  "Нүүдэл" их тайзтай ойрхон байрлаж байна.