Өнөөдөр Монгол Улсын гавьяат дасгалжуулагч Хоско багш буюу Цэрэнбаатарын Хосбаярын төрсөн өдөр тохиож байна. Тэрбээр Монголын ардын арми, “Алдар” спорт хороогоор овоглон тив, дэлхий, олимпын дэвжээнд өрсөлдөж явсан нэгэн. Харин өнөөдөр “Алдар” спорт хороондоо дасгалжуулагчаар ажиллаж, чөлөөт бөхийн тив, дэлхийн аваргуудыг бэлтгэн гаргаж сууна.

Хосоо багш чөлөөт бөхийн дасгалжуулагчийн албанд шилжээд  30 гаруй жил өнгөрчээ. Шавь нарынх нь амжилтыг тоочиж баршгүй. Энэ хугацаанд дэлхийн аварга МУГТ П.Орхон, дэлхийн аваргын алт, мөнгөн медальт МУГТ С.Цэрэнчимэд, дэлхийн аваргын хошой хүрэл медальт, Азийн наадмын аварга МУГТ Г.Мандахнаран, дэлхийн аваргын хүрэл медальт МУГТ Б.Одончимэг гээд  шилдэг тамирчдыг төрүүлэн гаргасан. Дэлхийн шилдгүүдийг төрүүлдэг Ц. Хосбаяр багшийн цаг наргүй ажил, хөдөлмөр, бэлтгэл, сургуулилалт тасралтгүй үргэлжилсээр байна.