Монголын Боксын холбоо шинэ Ерөнхийлөгчөө “өлгийдөж” аваад дөрөв хонож байна. Өчигдөр тус холбооны Удирдах зөвлөлийн хурал болж, гавьяат тамирчин Э.Цэндбаатарыг Үндэсний шигшээ багаас хөөх шийдвэрийг албажуулсан нь шуугиан тарилаа. Дэлхийн аваргын дэвжээнд тулалдахаар  бэлтгэлээ базааж байсан тамирчнаа хөөсөн нь ихэд сонирхол татаж байгаа юм.

Нэг үгээр бол “дүлий” мэт байсаар олимпын наадамтай золгосон гэсэн үг

             Учир мэдэх хүмүүс “Боксын холбоо Э.Цэндбаатарыг ашиглаад хаячихлаа” хэмээн жиг жуг хийцгээж байна. Учир нь, Монголын Боксын холбоо “Токио-2020” олимпын наадамд Э.Цэндбаатарт бат итгэж, найдлага тавьж байжээ. Тэд олимпоос медаль хүртэж, Боксын тамирчдын амжилтын буухиаг Э.Цэндбаатарыг үргэлжлүүлнэ хэмээн итгэж, алдаа дутагдал бүрийг нь уучилсаар ирсэн гэнэ. Нэг үгээр бол “дүлий” мэт байсаар олимпын наадамтай золгосон гэсэн үг. Харин итгэж байсан тамирчин нь амжилтаа “луйвардуулж”, ганзага хоосон ирснээр холбооныхны “сонсгол” орж, шигшээ багаас нь өчиггүй, дуу нэгтэйгээр хөөх шийдвэр гаргасан аж.

Гавьяат тамирчин Э.Цэндбаатар Үндэсний шигшээ багаас хөөгдөх ямар алдаанууд гаргасан бэ. 

2017 он. Боксын спортын ОУХМ, “Рио-2016” зуны олимпын наадмын тавдугаар байрын шагналт Э.Цэндбаатар 2017 оны гуравдугаар сарын 18-19 нд шилжих шөнө бусдад зодуулж, ГССҮТ-ийн Сэхээн амьдруулах тасагт ухаангүй хүргэгдсэн байдаг. Түүнийг үл таних согтуу залуус  зодож, улмаар автомашинаар хөөж,  мөргөсөн гэдэг. Тэрбээр энэ талаар ярихдаа “Хандгайтад байрласан байрнаасаа шөнөөр явсан нь бидний буруу. Би шигшээгийн зарим тамирчинтай дарвиж гараад, шоудсан. Уг нь бид ямар нэгэн асуудал гаргалгүй шууд бэлтгэлийн байр руугаа буцах гэж байсан юм. Нэг газраас гарч явтал хэдэн залуу араас ирснээ элдвээр хэлсэн. Бид эхэндээ "Шөнийн цэнгээний газар зодуулсан залуустайгаа андуурч байгаа бололтой" гэж бодсон юм. Тэгээд "Та нар хүн андуураад байна. Бид боксчин. Ямар нэгэн асуудал үүсгэмээргүй байна" гэтэл нэг нь "Чи муу боксчин байхаараа яадаг юм бэ. Томроод байгаа юм уу" хэмээнгүүтээ зодоон эхлүүлж, "Ална" гэж учир зүггүй дайрсан. Бид аль болох зодолдохгүйг хичээн, зугтаасан юм. Би такси барих гээд зогсож байтал нөгөө залуус араас машинаар гүйцээд ирдэг юм байна. Бүр урсгал сөрөнгүүтээ над руу тулаад ирлээ. Арай ч дайрчихгүй байлгүй дээ л гэж би бодсон л доо. Нэг мэдэхэд эмнэлэгт хэвтэж байсан. Би дахиж алдаа дутагдал гаргахгүй. Бор дарснаас хол яваарай” хэмээсэн юм. Байрласан байрнаасаа “оргож” шөнийн цэнгээний газарт зодоон үүсгэж, ухаангүй эмнэлэгт хүргэгдсэн түүнийг Боксын холбоо “уучилж” зүгээр өнгөрөөсөн юм.

Би дахиж алдаа дутагдал гаргахгүй. Бор дарснаас хол яваарай

2019 он. Эрдэнэт хотод болсон “Шилдэг-8” боксын тэмцээний дараа Э.Цэндбаатар багшийгаа зодож, танхайрсан хэрэг гарсан. Тэрбээр дасгалжуулагч С.Эрдэнэбатыг үг хэлээр доромжилж, зодоон үүсгэж, цагдаагийн байгууллагад шалгагдсан юм. Мөн түүнээс хар тамхины шинжилгээ хүртэл авсан гэх мэдээлэл бий.

Тус зодооны талаар дасгалжуулагч С.Эрдэнэбат хэлэхдээ “Би тухайн үед гурван тамирчинтайгаа хамт шигшээ багийнхны байрлаж байсан зочид буудлын хажууханд байрласан юм. Тэмцээний үеэр тамирчид 22:00 цаг гээд унтаж, амарсан байх ёстой. Медалийн төлөөх тоглолтын өмнөх орой 24:00 цагийн үед би буудлынхаа урд талд тамхи татаад зогсож байлаа. Гэтэл Э.Цэндбаатар нэг залуутай хамт бөөн дуу шуу болчихсон хашхираад ирж байхаар нь хамт зогсож байсан хүндээ “Би дутагдлын хажуугаар дуугүй өнгөрч чадахгүй. Нэг үг хэлээд асуудал үүсэх байх” гэж хэлээд би буруу хараад зогсчихсон юм. Э.Цэндбаатартай хамт явж байсан тамирчин нь миний урдуур явж байгаад намайг харснаа “Өө, багшаа уучлаарай” гэхээр нь “Чи чинь согтуу байгаа юм уу. Хурдан очиж амар” гэж хэлсэн. Гэтэл Э.Цэндбаатар нөгөө найзыгаа түлхэж, над руу агсарсан. “Чамайг яг одоо ална. Шигшээ багынхнаа дуудаж цааш харуулна. Би чамайг яг одоо алдаг дээрээ тавьчихсан байна” гээд л орилоод эхэлсэн. Э.Цэндбаатар согтуу байсан учраас намайг хоёр, гурван удаа цохихдоо хальт цохиод газар духаараа унасан. Тэрнээс би түүнийг ганц ч удаа цохиогүй. Э.Цэндбаатар надтай муудахаас 30 минутын өмнө баарнаас гараад хоёр эмэгтэй, гурван залууг элдвээр хэлж, тэдэнтэй зодолдсон байна лээ. Нэг эмэгтэйг нь Э.Цэндбаатар цохиж, ухаан алдуулсан гэсэн” хэмээн ярьж байлаа. Архи согтууруулах ундааны зүйл хэрэглэсэн үедээ дасгалжуулагч багшаа зодсон түүний Үндэсний шигшээ багийн нөхөд нь болон Боксын холбоо мөн л уучилсан юм.

Э.Цэндбаатар нөгөө найзыгаа түлхэж, над руу агсарсан. “Чамайг яг одоо ална. Шигшээ багынхнаа дуудаж цааш харуулна. Би чамайг яг одоо алдаг дээрээ тавьчихсан байна” гээд л орилоод эхэлсэн

2020 он. Тус оны арванхоёрдугаар сарын 10-нд  гавьяат тамирчин Э.Цэндбаатар “Олимпын гүүр”-ний урд авто замын хэсэгт хувцасгүй, нүцгэн, явж, чанга дуугаар гудамж талбайд “Би Монголын Цэндбаатар байна” хэмээн орилсон үйлдэл гарсан нь олны анхааралд өртсөн билээ. Хан-Уул дүүргийн нутаг дэвсгэрт Э.Цэндбаатарыг нүцгэн явж байхад нь Цагдаагийн алба хаагчид саатуулж, мэдүүлэг авч, ар гэрийнхэнд хүлээлгэн өгсөн байдаг. Саатуулах үедээ Э.Цэндбаатараас мансууруулах бодис, сэтгэцэд нөлөөт бодисын түргэвчилсэн шинжилгээ авсан билээ.

      Тэрбээр энэ талаар тайлбарлахдаа “Би толгойндоо гэмтэл авч, маш хүчтэй эм ууж байгаа” хэмээсэн юм. Хар тамхи хэрэглэж, мансуурсан байж болзошгүй гэх түүний хэрэг тэрүүхэндээ дарагдаад өнгөрсөн. Тухайн үед Боксын холбоо тамирчныхаа талаар ганц ч үг, авиа унагалгүй хэргийг “хаасан” юм.

2021 он. Монголын Боксын холбооны бага хурал есдүгээр сарын 5-нд Тусгаар тогтнолын ордонд болж, шинэ Ерөнхийлөгчөө сонгосон. Боксын тамирчид хурлын дараа “Наран плаза”-ын зургаадугаар давхарт байрлах “New york” ресторанд “найрлаж” зодолдсон байдаг. Э.Цэндбаатар цахим хуудастаа лайв хийж, “Энэ хоёр намайг зодчихлоо. Ингээд нэг айлын амьдрал дуусна шүү дээ” хэмээн цус, нөжтэйгөө холилдсон байдалтай ярьсан юм. Тэрбээр архи, согтууруулах ундааны зүйл хэрэглэсэн үедээ тус бичлэгийг хийж, боксчдод зодуулсан тухай дуудлагыг цагдаагийн байгууллагад өгсөн гэдэг.

 Харин түүнээс энэ талаар тодруулахад, үгүйсгэж, бичлэг хийгээгүй хэмээн мэлзсэн билээ.

Энэ бүх алдааны дараа Монголын Боксын холбоо хуралдаж, эцэст нь түүнийг Үндэсний шигшээ багаас хөөж орхилоо. Түүнийг удаа дараагийн сахилга, хариуцлага алдсан хэмээн ийм шийдвэр гаргасан аж.