Монголын ширэн бээлийтнүүд 1972 оноос эхлэн олимпын наадамд оролцож эхэлсэн. Тэгвэл энэ удаагийн “Токио-2021” олимпыг боксын шигшээ баг гурван тамирчны бүрэлдэхүүнтэйгээр зорино. Ингээд олимпын наадмыг зорих тамирчдыг танилцуулъя.

Шинэхэн Монгол Улсын гавьяат тамирчин Э.Цэндбаатар

“Рио-2016” олимпын наадмын V байрын шагналт Э.Цэндбаатар энэ сарын 11-нд Монгол Улсын гавьяат тамирчин хэмээх эрхэм цолыг хүртсэн билээ. Тэрбээр 1996 онд Архангай аймагт төрсөн бөгөөд 2008 оноос эхлэн боксын спортоор хичээллэхдээ өсвөр үе, залуучууд, насанд хүрэгчдийн Улсын аварга шалгаруулах тэмцээнээс нийт найман алтан  медаль хүртсэн байна. Мөн Монголын бүх ард түмний их наадмын алтан медаль, 2012 онд Якутск улсын Саха хотод зохиогдсон хүүхдийн их наадамд мөнгөн медаль, 2013 оны Ази тивийн залуучуудын аварга шалгаруулах тэмцээний хүрэл медаль хүртэж, олон улсын А зэрэглэлийн олон тэмцээнд амжилттай оролцож алт, мөнгө, хүрэл медалийн эзэн болсон юм. Түүнчлэн, “Жакарта-2018” Азийн XVIII наадмын аварга болж, 2019 оны ДАШТ-ий хүрэл медаль, 2019, 2021 оны Ази тивийн аварга болсон. Гавьяат тамирчин Э.Цэндбаатар анх 20 настайдаа хүн төрөлхтний эв нэгдлийн бэлгэдэл олимпын наадмыг зорьж байсан бөгөөд “Рио-2016” олимпын наадмын 60 кг-д шилдгүүдтэй гурван тулаан хийж, хоёр ялалт байгуулан, шагналт V байрт шалгарсан юм. Тиймээс түүнийг өмнөх амжилтаа ахиулан медалийн тавцанд зогсоно хэмээх хүлээлт их байгаа билээ.

Монголоос төрсөн анхны армийн дэлхийн аварга Б.Чинзориг

Алдар спорт хороо, үндэсний шигшээ багийн тамирчин, ОУХМ Б.Чинзориг 1992 онд Улаанбаатар хотод төрсөн. 2005 оноос эхлэн “Алдар” спорт хорооны багш, гавьяат дасгалжуулагч А.Гантулгын удирдлага дор боксын спортоор хичээллэж эхэлсэн. Тэрбээр 2010 оноос Монгол Улсын насанд хүрэгчдийн шигшээ багийн бүрэлдэхүүнд багтсан байдаг. Улмаар 2014 онд армийн байгууллагуудын тамирчдын дунд зохиогддог ДАШТ-д оролцож, дэлхийн шилдэг тамирчидтай хүч үзэн Армийн дэлхийн аварга болсон нь Монголын зэвсэгт хүчний тамирчдаас анхдагч нь болсон юм. Тэрбээр гавьяат тамирчин У.Мөнх-Эрдэнийн оролцдог байсан 63 кг-д энэ удаагийн олимпын наадамд тулалдах болно. “Токио-2021” олимпын наадам нь түүний оролцож буй хоёр дахь олимпын наадам юм. Түүний хувьд олимпын наадмын дараа мэргэжлийн бокст хүч үзэхээ илэрхийлээд байгаа билээ.

Олимпын наадамд оролцох анхны эмэгтэй боксчин М.Мягмаржаргал

Монголын эмэгтэй боксчдоос анх удаа олимпын наадмын рингд М.Мягмаржаргал гарахаар болсон билээ. М.Мягмаржаргалын хувьд 1991 онд төрсөн бөгөөд 2012 оноос эхлэн “Ширэн бээлий” клубийн Д.Төрбат багшийн удирдлага дор боксын спортоор хичээллэж эхэлжээ. 21 настайгаасаа эхлэн боксын спортоор хичээллэж эхэлсэн түүний хувьд дэлхийд чансаагаараа наймдугаарт бичигдсэнээр ийнхүү монгол эмэгтэй боксчдын өмнө шинэ хаалга нээсэн юм. Монгол Улсын боксын дөрвөн удаагийн аварга, Дэлхийн аварга шалгаруулах тэмцээний хүрэл медальт М.Мягмаржаргал олимпын наадмын эмэгтэйчүүдийн 75 кг-ын жинд тулалдах болно.