Дэлхийн бөхийн төрлүүдийн чансаа олгох “Poland open” тэмцээн энэ сарын 8-13-ны өдрүүдэд болж байна. Уг тэмцээнд манай улсаас гурван тамирчин оролцож байгаа. Тодруулбал, эмэгтэйчүүдийн 55 кг-д Э.Сумъяа, 68 кг-д О.Насанбурмаа, С.Батцэцэг нар зодоглож байна. Тэгвэл 55 кг-д зодоглосон ОУХМ Э.Сумъяа тус тэмцээнээс мөнгөн медаль хүртлээ. Тэрбээр алтан медалийн төлөө “Нур-Султан-2019” ДАШТ-ий хүрэл медальт, Европын хошой аварга ОХУ-ын Ольга Хорошавцеватай хүч үзэж цэвэр ялагдсан юм. Сонирхуулахад, Э.Сумъяа 2016 онд тус тэмцээнээс мөнгөн медаль хүртэж байсан бөгөөд ийнхүү таван жилийн дараа дахин үзүүрлэж, хошой медальтан боллоо.

Мөн манай улсаас хөдөлмөрийн баатар С.Батцэцэг, гавьяат тамирчин О.Насанбурмаа нар 68 кг-ын жинд хүч үзэх бөгөөд барилдаан өнөөдөр 17:00 цагаас эхэлнэ.