COVID-19 халдварын анхны тохиолдол болох Франц улсын иргэн буюу олны нэрлэснээр "Анх-Отгон" өнөөдөр Улаанбаатар-Франкфурт чиглэлийн тусгай нислэгээр эх орондоо буцна . 3-р сарын 10-нд халдвартай нь тогтоогдсон франц иргэн ХӨСҮТ-д 47 хоногийн турш эмчилгээ хийлгэн  4-р сарын 26-нд эдгэрсэн тул эмнэлгээс гарч, Энхсаран сувилалд үргэлжлүүлэн тусгаарлагдаад байсан юм. ХӨСҮТ-ийн ерөнхий захирал Д.Нямхүү анх түүнийг эдгэрсэн  мэдээллийг  хүргэхдээ "Монгол эмч, эмнэлгийн ажилчид түүнийг эдгээж чадлаа  Анх хүнд ирээд ХӨСҮТ-д эмчилгээнд орсныг та бүхэн мэдэж байгаа. Франц улс өөрийнхөө иргэнийг харна, үүнийг дагаад дэлхий биднийг харна.  Дэлхийн аль ч улс оронд монгол хүн өвдөх эрсдэл өндөр байгаа учраас бид бас жишиг болголоо. Энэ хүнийг эмчилж, эдгээж сайхан хандсаны хариуг бусад улсууд манай иргэдэд барих байх гэж бодож байна.  Ер нь уушигны үрэвслийг шимэгдүүлэх, цусан дахь хүчилтөрөгчийн хэмжээг хэвийн байлгахад онцгой анхаарч ажилладаг. Эмчилгээний үр дүн гарлаа” гэдгийг  хэлсэн юм.