Ховд аймгийн Алтай суманд энэ сарын 5-ныг хүртэл хатуу хөл хорио тогтоохоор болжээ. Тодруулбал, тус суманд Улаанбаатар хотоос коронавирусийн халдвар илэрсэн нэг иргэний ойрын хавьтагч очсон байна.

Иймд сумын Засаг даргын захиамжаар энэ сарын 2-ноос 5 хүртэл сумын хэмжээнд хатуу хөл хорио тогтоож, дам хавьтагч нарыг илрүүлэх, шинжилгээнд хамруулах ажлыг зохион байгуулахаар болжээ. Ховд аймагт өнгөрсөн хугацаанд сэжигтэй тохиолдол хэд хэдэн удаа бүртгэгдэж байсан ч батлагдсан тохиолдол гараагүй юм. Одоогийн байдлаар манай улсад дотоодод халдвар илэрсэн тохиолдол 1242-т хүрч өнөөдөр 22 тохиолдол шинээр нэмэгдсэн билээ. Мөн эх үүсвэр нь тодорхойгүй дөрвөн голомт байгаа талаар Эрүүл мэндийн сайд Т.Мөнхсайхан мэдээлсэн. Иймд халдвартай хүн иргэдийн дунд байх эрсдэлтэй бөгөөд хөл хориог дахин сунгаж магадгүй гэсэн юм.