Эрүүл мэндийн яамнаас коронавирусийн тархалтын талаар ээлжит мэдээлэл хийж байна. 

Өчигдрийн 11:00 цагийн байдлаар улсын хэмжээнд 8574 хүнд PSR  шинжилгээ хийхэд Сэлэнгэ аймагт ойрын хавьтлын таван  хүнээс халдвар илэрсэн билээ. Ингэснээр Сэлэнгэ аймагт 213 тохиолдол батлагдаад байгаа юм. Харин Улаанбаатар хот, Орхон, Дархан-Уул, Говьсүмбэр, Архангай, Дорноговь аймагт халдвар илрээгүй.

Харин өнөөдрийн нөхцөл байдлын талаар ХӨСҮТ-ийн Тандалт судалгааны албаны дарга А.Амбасэлмаа "ХӨСҮТ, ЗӨСҮТ, Дархан-Уул, Орхон, Сэлэнгэ аймагт  шинжилгээ хийхэд таван хүнээс халдвар илэрлээ. Тодруулбал, Улаанбаатар хотод хоёр, Сэлэнгэ аймагт хоёр, Дорноговь аймагт нэг тохиолдол батлагдлаа. Халдвар илэрсэн хүмүүс тусгаарлалтад байсан ойрын хавьтлууд. Харин бусад голомттой аймагт халдвар илрээгүй. Манай улсад хэмжээнд нийт 917 тохиолдол бүртгэгдэж, дотоодын халдвар 464 болсон байна. Үүнээс 384 хүн эдгэрч, 524 хүн эмчлэгдэж байна. Эмчлүүлж байгаа хүмүүсийн биеийн байдлын хувьд хөнгөн 450, хүндэвтэр 68, хүнд тав, маш хүнд нэг байна" гэлээ.