Эрүүл мэндийн яамнаас коронавируст халдварын нөхцөл байдлын талаарх ээлжит мэдээлэл өгч байна. Өчигдрийн 11:00 цагийн байдлаар 11929 хүнд шинжилгээ хийснээс 22 хүнээс коронавирусийн халдвар илэрсэн талаар мэдээлсэн билээ. Мөн Архангай аймгийн Батцэнгэл суманд очсон хүнс тээвэрлэлтийн машины жолоочоос халдвар илэрч, тус аймаг батлагдсан тохиолдол хоёр болоод байна. Тодруулбал, жолооч Б-гийн таван настай хүүгээс халдвар илэрсэн юм. Ингэснээр Улаанбаатараас гадна Дархан-Уул, Орхон, Говьсүмбэр, Сэлэнгэ, Дорноговь, Архангай зэрэг зургаан аймагт коронавирусийн халдвар батлагдаад байна. 

Харин өнөөдрийн нөхцөл байдлын талаар ХӨСҮТ-ийн Тандалт судалгааны албаны дарга А.Амбасэлмаа “ХӨСҮТ, ЗӨСҮТ, Сэлэнгэ, Дархан, Орхон аймагт нийтдээ 9513 хүнд шинжилгээ хийхэд 24 хүнээс халдвар илэрлээ. Улаанбаатар хотод таван тохиолдол бүртгэгдлээ. Тодруулбал, ачаа тээврийн жолоочийн давтан шинжилгээгээр алдвар илэрсэн. Бусад нь голомт халдварын ойрын хавьтлуудаас илэрсэн. Ингэснээр Улаанбаатар хотод дотоодын халдвар 75 боллоо. Мөн Сэлэнгэ аймагт долоо, Дархан-Уулд ес, Архангайд хоёр шинэ тохиолдол батлагдсан. ХӨСҮТ-өөс долоон хүн эдгэрч гарчээ. Монгол Улсад батлагдсан тохиолдол 784 боллоо. Үүнээс 354 хүн эдгэрч, 421 хүн эмчлэгдэж байна. Одоогийн байдлаар биеийн байдал нь маш хүнд хоёр хүн байна " гэлээ.