Онцгой байдлын ерөнхий газар /ОБЕГ/-ын дарга Т.Бадрал: 

Эрүүл мэндийн салбараас тусгаарлалтад байгаа иргэдийн тусгаарлах хугацааг сунгах саналыг Эрүүл мэндийн яамнаас тавьсан. Үүнтэй уялдуулан хэд хэдэн судалгаа хийгдсэн. Коронавирусийн халдварын  нууц үе нь 14 хоног биш сүүлийн үеийн судалгаагаар 5.5-19 хоног болсон байна. Тиймээс тусгаарлах иргэдийг хамгийн багадаа 21-28 хоног тусгаарлах хүсэлт тавьсан. Үүний дагуу сүүлд дөрвөн нислэгээр ирсэн 1000 орчим иргэнийг тусгаарлах хугацааг дахин долоо хоногоор сунгах шийдвэр УОК-оос гаргалаа. Мөн  нэг өрөөнд олуулаа байх нь эрсдэлтэй байна. Мөн нууц үе нэмэгдэж байгаа учраас нэг нь нөгөөдөө халдварлах магадлал өндөр гэсэн дүгнэлтийг гаргасан. Тиймээс тусгаарлагдах байранд иргэдийг нэг өрөөнд ганцаар нь байлгахаар ярьж байна. Энэ мэдээж хүндрэлтэй. Тусгаарлах байранд иргэд 2-5-уулаа байна. Тиймээс цаашдаа ганц ганцаар нь байлгах өөрчлөлт хийнэ. Дараагийн 750 хүнээ хүлээж авна гэвэл бидэнд 750 ор мөн 750 өрөө  хэрэгтэй. Гэвч гаднаас ирж буй иргэдийг зочид буудлуудад нэг нэгээр нь байршуулах шийдвэр гарвал бэлдсэн байрууд хүрэлцэхгүй. Энэ нөхцөлд Дайчилгааны хуулийн дагуу зочид буудлуудад мэдэгдэл хүргүүлэн, хамтран ажиллана.

Хотын төвд тусгаарлах нь эрсдэлтэй. Тиймээс хотын төвөөс гадагш гаргах асуудал яригдсан. Одоогоор бидэнд бэлэн байгаа байрууд хамгийн дээд тал нь 300 хүний ортой хотын гадна амралт байна. Өрөөгөөр нь тооцвол тэнд 60-70 хүнийг тусгаарлана. Бидний анх тооцоолж байсан бүхэн бүрэн өөрчлөгдөж байна. Сүүлийн батлагдсан тохиолдол өрөөндөө хоёул байсан. Хоёуланг нь ХӨСҮТ- рүү шилжүүлж, хамт байсан хүнийг нь хяналтад авсан.  14 хоногийн тусгаарлалтын төлбөрөө төлсөн иргэд нэгэнт 14 хоногийн төлбөр тооцоогоо хийчихсэн учраас нэмэгдсэн долоо хоногийн төлбөрийг нь Засгийн газар нөөц хөрөнгөөсөө шийдвэрлэнэ. Мөн тусгаарлалтын 14 хоногийн төлбөр болох 700 мянган төгрөг дээр долоо хоногийн төлбөр болох 350 мянган төгрөг нэмэгдэж нийт 1 сая 50 мянган төгрөг болж байна. Нөхцөл байдал цаг цагаар өөрчлөгдөж байна. Манай улстай хамгийн ойр Улаан-Үдэд халдвар илэрлээ.  Маргааш өглөө 06:00 цагт Алтанбулаг боомтоос иргэдээ авна. Энэ үйл ажиллагаа нь нэг л удаа явагдана