Коронавирусийн халдварын нөхцөл байдлын талаар Эрүүл мэндийн яамнаас мэдээллээ. Үүний дараагаар ХӨСҮТ-ийн Тандалт судалгааны албаны дарга  А.Амбасэлмаа сэтгүүлчдийн асуултад хариуллаа.  

-Улаанбаатар хотод 11 тохиолдол бүртгэгдлээ гэлээ. Ямар хавьтлуудаас халдвар илэрсэн бэ?

-Сүүлийн тохиолдол Сонгинохайрхан дүүргээс илэрсэн. Халдвар авсан иргэд гомдол гаргаж байгаа учраас маршрутыг тодорхой хэлэх боломжгүй. Шинээр бүртгэгдсэн 11 халдварын тохиолдол нь төмөр замын голомтын ойрын хавьтлууд байгаа. Бид тэднийг арваннэгдүгээр сарын 20-21-нд тусгаарлах байранд тусгаарлаад байсан.

-Коронавирусий халдвараар өвчилсөн иргэдийн амтлах, үнэрлэх мэдрэмж буцаад сэргэхгүй байгаа талаар мэдээлж байна. ХӨСҮТ-ээс эдгэрч гарсан хүмүүстэй хэрхэн холбоотой байдаг вэ?

-Эдгэрч гараад эмнэлзүйн шинж тэмдэг илэрч байгаа бол ХӨСҮТ-д хандаарай. Магадгүй өөр вирусийн халдвар авсан байж болно Тийм учраас дахин давтан шинжилгээнд оруулах шаардлагатай. Мөн ХӨСҮТ-ээс эдгэрч гарсан 340 хүнийг бид харьяа дүүрэг, өрх, аймаг, сумын эмнэлэгт нь хүлээлгэж өгдөг. Одоогийн байдлаар эдгэрсэн хүмүүсээс дахиж халдвар илэрсэн тохиолдол байхгүй.

-Улсын хэмжээнд оношлуурын нөөц ямар байна вэ?

-Хүн ардын дунд өргөн хүрээний шинжилгээ авч байна. Одоогийн байдлаар оношлуурын нөөц хангалтай бий. Мөн амны хаалт, эм хэрэглээний нөөц хангалттай сайн байгаа. Түүнчлэн вирусийн эмийн нөөц хангалттай байгаа гэдгийг дахин хэлье