Халдвар авсан МУБИС-ийн оюутны найз нь Бөхмөрөн, Түргэн суманд очжээ

              Увс аймгийн Түргэн, Бөхмөрөн суманд сэжигтэй тохиолдол бүртгэгджээ. Тодруулбал, халдвар илэрсэн МУБИС-ийн оюутантай уулзсан байж болзошгүй 20 орчим насны залуу Улаанбаатар хотоос гурав хоногийн өмнө Түргэн суманд очжээ. Ингэхдээ тэрбээр Түргэн суманд нэг хоноод, Бөхмөрөн рүү явсан гэнэ. Энэ талаар тус сумын Онцгой байдлын шуурхай штабын ажилтнаас тодрууллаа.

       Тэрбээр “Коронавирусийн халдвартай холбоотойгоор аймгийн төвөөс хяналтын баг манай суманд ажиллаад явлаа. Халдвар гарснаас хойш Улаанбаатар хотоос манай суманд олон хүн ирсэн учраас эрсдэлтэй байна гэж үзсэн. Тухайлбал, Тамгын газрын хэд хэдэн ажилтан Улаанбаатар хотод сургалтад суугаад ирсэн юм. Тэр хүмүүсийг эрсдэлтэй бүсээс ирсэн гэж үзээд арваннэгдүгээр сарын 17-нийг хүртэл гэртээ өөрсдийгөө тусгаарлах зөвлөмж өгсөн. Харин халдвар илэрсэн МУБИС-ийн оюутантай уулзсан байж болзошгүй нэг хүү гурав, дөрөв хоногийн өмнө суманд ирсэн. Тэр хүү Түргэн сумын харьяат ч Бөхмөрөнгийн уурхайд ажилладаг гэсэн. Тэгээд Улаанбаатар хотоос ирэхдээ манай сумын хоёр айлаар ороод, хоноод Бөхмөрөн руу явсан өгүүлэмжтэй байгаа. Тэр хүүгийн хоносон болон Улаанбаатар хотоос цуг ирсэн хүмүүсийг тусгаарлаад байна. Одоогийн байдлаар ямар нэгэн шинж тэмдэг илрээгүй байна. Хүүгийн очсон хоёр айлыг ч мөн тусгаарласан” гэх мэдээллийг өгөв.