Иргэний цэргийн албанд эрүүл мэндээр тэнцүүлэх болон цэргийн албан хаагчийн эрүүл мэндийг тодорхойлох журам 2017 онд баталсан. тус журмын дагуу эрүүл мэндийн шалтгаанаар тэнцэхгүй байх 18 төрлийн өвчин эмгэг нэмэгджээ. Тодруулбал, уушгины шохойжилт, олон өнгөт үлд, чихний хэнгэрэг цүлхийсэн, хиймэл болор тавиулсан зэрэг оноштой залуус цэргийн алба хаах боломжгүй болсон байна.

Өнгөрсөн Лхагва гаригт болсон Цэргийн насны залуучуудын “Эрүүл мэндийн үзлэг” сэдэвт уулзалт зөвлөгөөн дээр нийслэлийн Эрүүл мэндийн газрын дарга Л.Төмөрбаатар хэлэхдээ “Залуучуудын дунд эрүүл мэндийн боловсрол дутмаг, өвчтэй эсэхээ цэрэг татлагын эрүүл мэндийн үзлэгт орж байж мэдэх тохиолдол гардаг. Иймд дүүргийн эрүүл мэндийн нэгдсэн төвүүд үнэгүй үзлэг оношилгоог тогтмол зохион байгуулах шаардлагатай” гэв.
Дэлхий даяар тархаад буй цар тахлын улмаас нэгдүгээр ээлжийн цэрэг татлага болоогүй. Энэ оны хоёрдугаар ээлжийн цэрэг татлага аравдугаар сарын 22-25-ны хооронд болох юм.

Өнгөрсөн оны хоёрдугаар ээлжийн цэрэг татлагын эрүүл мэндийн үзлэгт нийт 12874 иргэн хамрагдсан. Цэргийн насны залуучуудын 5209 буюу 40 хувь нь эрүүл мэндийн шаардлагаар тэнцээгүй байна. Оношийн бүлгээр авч үзэхэд мэс заслын өвчнөөр 1090, дотрын өвчнөөр 735, чих хамар хоолойн өвчнөөр 672, гэмтлийн улмаас 570, арьс харшлын өвчтэй 350 иргэн цэргийн алба хаах боломжгүй болжээ.