Палестины “ХАМАС” бүлэглэл Израилын хотуудад гэнэтийн цохилт өгч, энгийн иргэдийг барьцаалснаас хойш 66 өдөр өнгөрчээ. Сүүлийн 10 гаруй жилийн турш Газын зурвасын асуудлаар сөргөлдөөнтэй байгаа хоёр талын энэ мөргөлдөөн нэгэн жижиг орныг олон улсын тавцанд гаргаж, анхаарлын төв болгож байгаа нь Катар Улс. Катар АНУ, Их Британийн “ХАМАС”-т барьцаалагдсан хүмүүсийг суллахад том нөлөө үзүүлсэн гэх бөгөөд эрх баригчид Катарын талд талархал илэрхийлж байв. Тэгвэл Израилын армийн Газын зурвасын чухал ач холбогдолтой бүсэд хяналт тогтоосонтой холбоотойгоор “ХАМАС” бүлэглэл барьцаанд байгаа хүмүүсийг хөнөөнө гэж заналхийлээд байгаа энэ үед Израил иргэдээ аврахын тулд Катартай холбоо тогтоож, тусламж хүсэх талаар олон улс шинжээчид хэлж байна.

-БАРЬЦААНЫ ХҮМҮҮСИЙГ СУЛЛАХ АЖИЛЛАГАА ХЭРХЭН ӨРНӨЖ БАЙГАА ВЭ-

Катарын нийслэл Дохад “ХАМАС” бүлэглэлийн улс төрийн нэг төв 2012 оноос үйл ажиллагаа явуулж байгаа аж. Тиймээс Катарын талаас өөрийн нийслэл хотдоо “ХАМАС”-ын төлөөлөгчидтэй уулзаж, барьцааны хүмүүсийг суллах хэлэлцээ удаа дараа хийж байна. Гэхдээ хоёр талыг зөвхөн “ХАМАС”-ын төв Катарт үйл ажиллагаа явуулдаг нь холбодоггүй гэнэ. Тухайлбал, Катарын Эмир шейх Хамад бин-Халифа Аль-Тани 2012 онд “ХАМАС” бүлэглэлийн засаг захиргаанд айлчилж байсан бөгөөд террорист байгууллагын төв айлчилсан дэлхийн анхны төрийн тэргүүн болж байв. Үүнээс гадна Катар 2018 оноос хойш Газын зурвас ядууралд нэрвэгдсэн иргэдийн амьдралыг дэмжих зорилгоор мөнгөн тусламж үзүүлж байгаа аж. Тиймээс ч Газын дайны нөхцөл байдал хурцдаж байгаа энэ үед барьцааны хүмүүсийн асуудлаар Катарын тал зуучлагчаар “ХАМАС”-тай хэлэлцэж, тохирсон нь илүү үр дүнтэй болж байгаа юм байна.

                             “ХАМАС” бүлэглэл Израилын хотуудад халдаж, энгийн иргэдийн барьцаалахад цөөнгүй өөр орны иргэн барьцаалагдсан. Үүнтэй холбоотойгоор АНУ, Их Британиас барьцаанд байгаа иргэдээ суллаж авах асуудлаар Катарын талтай тохиролцож, Катар цааш нь “ХАМАС”-тай хэлэлцээ хийж, АНУ, Их Британийн иргэдийг аюулгүй суллаж авсан байдаг. Иргэдээ аюулгүй суллаж авсан АНУ-ын Ерөнхийлөгч Жо Байден, Их Британийн Ерөнхий сайд Риши Сунак нарын хүмүүс Катарын талд талархал илэрхийлж байв. Мөн олон улсын зарим агентлагийн мэдээлснээр Катарын төрийн өндөр албан тушаалтнууд “ХАМАС” бүлэглэлтэй ойр дотно байдаг бөгөөд хэлэлцээрийн зарим асуудлыг утсаар холбоо бариад ярьсан гэнэ.

-ИЗРАИЛЫН ТАЛ БАРЬЦААНД БАЙГАА ИРГЭДЭЭ СУЛЛАХ АСУУДЛААР ЗУУЧЛАГЧИДТАЙ ХОЛБОО ТОГТООХОД БЭЛЭН ГЭВ-

Израилын хэвлэлүүд тус улс Газын зурваст барьцаанд байгаа иргэдээ суллахын тулд зуучлагч орнуудтай дахин холбоо тогтооход бэлэн байгаа талаар мэдээлж эхэлжээ. “ХАМАС” Израилд халдаж, иргэдийг барьцаалснаас хойш Израилын тал хэд хэдэн удаа барьцаанд байгаа хүмүүсийг суллахаар Катартай холбоо тогтоосон байдаг. Гэсэн ч Израил Катартай албан ёсоор дипломат харилцаа тогтоогоогүй байсан нь сөргөөр нөлөөлжээ. Одоо Израилын эрх баригчид Катартай ойр дотно, дипломат харилцаатай хөрш Бахрейн, Арабын Нэгдсэн Эмирт Улсаар дамжуулан тус улстай холбоо тогтоож, “ХАМАС”-тай хэлэлцээрийн ширээний ард суух хүсэлт гаргах талаар шинжээчид онцолсон байна.

                             Израилын тал 7000 орчим палестин идэвхтнийг хорьж байгаа. Тиймээс хорьж байгаа палестин идэвхтнүүдийг солилцох шинэ хэлэлцээр хийх төлөвтэй байгаа юм байна. Солилцоог хүмүүнлэгийн итгэлцлийн хүрээнд хийх бөгөөд эхний ээлжинд барьцаалагдсан эмэгтэйчүүд, өвчтэй болон шархад иргэд, өндөр настнуудыг хамруулах гэнэ. Одоогоор “ХАМАС” бүлэглэлийн барьцаанд Израилын 126 иргэн, өөр орны иргэншилтэй 11 хүн байгаа талаар “Anadolu” мэдээлжээ. Олон улс “ХАМАС” бүлэглэлийг барьцааны хүмүүсийг газар дорх хонгилд хорьж байгаа гэж үзэж байгаа бөгөөд өнгөрсөн даваа гарагт хийсэн “ХАМАС”-ын мэдэгдэлтэй холбоотойгоор Израилын цэргийн хүчээ хойш татаж, зуучлагч орнуудаар дамжуулан “ХАМАС”-тай хэлэлцээрийн ширээний ард суух бололтой.