БОАЖ-ын шинэ сайдаар томилогдож буй Б.Бат-Эрдэнэтэй холбогдож, зарим зүйлийг тодрууллаа. 

-Таныг БОАЖ-ын шинэ сайдаар томилох шийдвэр гэнэтийн байв уу. Өмнө нь энэ тухай танд мэдэгдсэн үү?

     -Гэнэтийн шийдвэр байлаа. Одоо чуулганы хуралдаанд орохоор хүлээгээд сууж байна. Дараа нь Ерөнхийлөгчтэй уулзана.

-Та сайдаар томилогдоод хамгийн эхэнд ямар ажил хийхээр төлөвлөж байна вэ. Утааг бууруулах гарц, боломжийг хэрхэн харж байна вэ?

     -Байгаль орчин, аялал жуулчлалын салбарын асуудал өргөн хүрээг хамардаг. Зөвхөн агаарын бохирдлоор хэмжигдэхгүй. Гэхдээ жил бүрийн энэ үед утааны асуудал яригддаг. Өнгөрсөн хугацаанд “Таван толгой түлш” ХХК яаж их хэмжээгээр түлшээ үйлдвэрлэх вэ гэдэгт анхаарсан болохоос чанарын дэвшилтэд тулгуурласан судалгааг бага хийсэн гэж үзэж байгаа. Тэгэхээр хамгийн түрүүнд техникийн шинэчлэл болон сайжруулсан шахмал түлшний орц найрлагатай холбоотой асуудлыг судлах нь чухал байна. Сайжруулсан шахмал түлшийг лабораторийн дүгнэлтээр стандартын шаардлага хангасан гэж гарч байгаа. Тэгэхээр стандарт нь ямар байна вэ гэдгийг харах ёстой. Үүнд хамгийн чухал асуудал байж болзошгүй. Мөн агаар орчны бохирдлыг бууруулах хөтөлбөртэй холбоотой асуудлууд бий. Зөвхөн сайжруулсан шахмал түлштэй холбоотой асуудал биш гэдгийг сайн ойлгох хэрэгтэй. Агаарын бохирдлыг эх үүсвэрийг бий болгож буй автомашины утаа, халаалтын зуух, гэрийн зуух, дулааны цахилгаан станцын утаатай холбоотой асуудлыг судалж, анхаарч ажиллах хэрэгтэй байна. Гэх мэтчилэн технологийн шийдлүүд, шахмал түлшний орц найрлагатай холбоотой асуудалд анхаарч ажиллана.

-Нийслэлээс гадна аймгуудад утаа их байгаа. Орон нутагт хэрхэн анхаарч ажиллахаар байна вэ?

    -Эрдэнэт, Дархан утаатай болсон. Зөвхөн Улаанбаатар хотын хэмжээгээр Байгаль орчин аялал жуулчлалын салбарын асуудлыг харж болохгүй. Бүх түвшинд асуудлыг бүрэн шийдвэрлэх ёстой. Утааны асуудлыг хамгийн түрүүнд шийдвэрлэж, танилцаж, гол шийдвэрийг гаргах ёстой. Үргэлжлүүлэн нийслэлийн Засаг даргын Тамгын газрынхантай агаар, хөрсний бохирдлыг хэрхэн бууруулах тухай ярилцаж шийдвэрлэнэ.

-Хамгийн эхэнд утааг буурах ажил хийнэ гэж ойлгож болох уу. Үүний хажуугаар ямар ажил хийх бол?

     -Хамгийн түрүүнд утааг бууруулах ажил хийнэ гэж ойлгож болно. Мөн уушгинд сөргөөр нөлөөлдөг агаарын бохирдол бол тоос шороо, хог хаягдал байдаг. Сонгинохайрхан дүүргийн нутаг дэвсгэрээс тоос шороо их орж ирдэг. Энэ бүхнийг углуургаар нь шийдэж, ажил хэрэг болгоно. Дүүрэг бүрд цэцэрлэгт хүрээлэн байгуулж, иргэдийн ая тухтай орчныг бүрдүүлэхэд анхаарна. Ерөнхийлөгчийн санаачилсан тэрбум модыг байгальд тарихаас илүүтэйгээр Улаанбаатар хотын хэмжээнд айлын хашаанд тарих ажлыг сайн хийх ёстой. Гэр хороололд амьдарч байгаа айлуудын 90 хувь нь хашаандаа модгүй байна. Мөн 95 хувь нь нүхэн жорлонтой байгаа. Энэ нь хөрсний бохирдол бий болгож буй хамгийн том асуудал. Үүнийг яаралтай шийдэх  ёстой байна.