Хөвсгөл аймгийн Эрдэнэбулган сумын гуравдугаар хорооны айлууд, мал, хашаатайгаа усанд автсан гэх мэдээлэл бий. Энэ талаар тус сумын ЗДТГ-ын дарга М.Оюумаагаас тодрууллаа.

     Тэрбээр “Манай сум Эгийн гол дагуу байрладаг. Тийм учраас жил бүр гол усны аюулаас болгоомжилж хашлага, хашаа бэлддэг. Харин өдий үед ус халих тохиолдол ойрын жилүүдэд гараагүй. Арванхоёрдугаар сар өмнөх жилүүдийнхээс дулаан байсан учир голын ус хальсан гэж таамаглаж байна. Эгийн голын ойролцоо манай сумын 33 айл бий. Түүний 30 нь сумын төвд харьяалагддаг. Тус голын дагуу өвөлждөг гурван айлыг малтай нь нүүлгэн шилжүүлсэн. Мөн голын ойролцоох айлууд нүүсээр байна. Аврагчид өчидөр 50 орчим үхэр гурван автомашинтай голоор гаргаж байгаад мөсөнд сууж,  автомашинаа гаргаж чадаагүй байна. Голын ус хөлдсөн даруй үхрээ буулгаж гол, уснаас гаргаж өвөлжөө бараадуулсан. Мөн хугацаанд нэг хонь усанд унаж үхсэн. Сүүлчийн хоёр өдөр 120 гаруй хүн аврах ажиллагаанд оролцсон. Өнөөдөр 40 гаруй хүн ажиллаж байгаа. Аймгийн Онцгой байдлын газрын аврах ангийн найман аврагч, аймгийн Засаг даргын тамгын газраас зургаан мэргэжилтэн ажиллахаар ирж байгаа” гэлээ.