• Өнөөдөр 2024-03-29

Б.ӨЭЛҮН: Ээжийнхээ мөрөөдлийг биелүүлж загвар өмсөгч болсондоо баяртай байдаг

2023-03-22,   1300

        Дубай хотноо зохион байгуулагдсан "World fashion festival awards","Fashion Factor" загварын шоунд амжилттай оролцсон "Hatun" агентлагийн загвар өмсөгч Б.Өэлүнтэй ярилцлаа. Тэрбээр 15 настайгаасаа загвар өмсөгчөөр ажиллаж эхэлжээ.

-Танд энэ өдрийн мэнд хүргэе. Яагаад загвар өмсөгч болохоор шийдсэн бэ?

                -Би багаасаа “Victoria's Secret”-ийн загварын шоуг үзэж, тайзан дээр нь алхаж байгаа моделиуд шиг нь болохыг хүссэн.  Ээжийн минь загвар өмсөгч болохыг хүсдэг байсан мөрөөдөл нь ч нөлөөлсөн л дөө. Наймдугаар ангид байхдаа “Шилмэл модель” агентлагийн загвар өмсөгчийн анхан шатны сургалтыг төгссөн. Дараа нь бүжгээр хичээллэж байгаад арван нэгдүгээр ангиасаа “Hatun” агентлагт суралцаж эхэлсэн. Агентлагийнхаа гэрээт моделиор тав дахь жилдээ ажиллаж байна.

-Яагаад бүжгийн урлагаар хичээллэх болсон бэ. Бүжиглэдэг байсан нь загвар өмсөхөд эергээр нөлөөлсөн үе бий юү?

                -Багаасаа бүжигт сонирхолтой, хичээллэдэг байсан. Анх эгчийнхээ “Te amo dance” бүжгийн клубт энэ урлагт суралцаж, цаашлаад анхан шатны багшаар ажиллаж байлаа. Бүжгийн бэлтгэлийн үеэр “Hatun” агентлагийн захирал Б.Батдулам багштайгаа уулзаж, надад загвар өмсөгч болох санал тавьснаар агентлагтаа анх орж байгаа. Би чинь багшийнхаа ууган шавь шүү дээ.

-Ямар мэргэжлээр сурдаг вэ. Ирээдүйд загвар өмсөгчөөр үргэлжлүүлэн ажиллах уу?

                -Монгол Улсын их сургуульд эдийн засагч мэргэжилээр сурч байгаа. Сургуулиа төгссөн ч загвар өмсөгчөөр ажиллахаа зогсоохгүй гэж боддог. Аль алийг нь орхигдуулалгүйгээр авч явахыг хичээнэ.

-Дубай хотод зохион байгуулагдсан "World fashion festival awards","Fashion Factor" загварын шоунд оролцсон сэтгэгдлээсээ хуваалцахгүй юу?            

                -Би анх удаа олон улсын загварын тайзан дээр алхаж үзлээ. Алдартай загвар зохион бүтээгчдийг харж, хувцсыг нь өмссөн догдлом өдрүүд байлаа. Загварын шоунд оролцохоор Дубай хот руу нисэж байхдаа “Би үнэхээр олон улсын тайзан дээр алхана гэж үү” гээд итгэхгүй байсан. Нэг талаараа миний олон улсын тайзан дээр алхах мөрөөдөл минь биелсэн. Загвар зохион бүтээгчдийн “Миний загварыг өмссөн анхны монгол модель боллоо” гэж хэлүүлэх сайхан юм билээ. 

-Олон улсын загварын шоунд оролцоод анзаарсан зүйл бий юү?

                -Дубай хотод болсон загварын шоунд оролцохоор очоод өрсөлдөөн ихтэй салбар гэдгийг ойлгосон. Олон улсын загвар өмсөгчид, загвар зохион бүтээгчдийн хувцсыг өмсөхийн тулд хэрхэн шаргуу ажиллаж байгааг анзаарсан. Өрсөлдөөн ихтэй салбар юм билээ. Өөрийгөө хэрхэн хөгжүүлж, юу сурах хэрэгтэй талаараа бодсон доо.

-Анхны тайзны алхаагаа хийж байсан үеэ дурсахгүй юу?

                -Би анхны алхаж байсан загварын тайзаа сайн санадаггүй юм. Гэхдээ сургалтын төвийн жижигхэн тайзан дээр алхахдаа сэтгэлд багтамгүй их аз жаргал мэдэрсэн. “Ингээд моделийнхоо гарааг эхлүүлчихлээ шүү дээ” гээд нүүр дүүрэн инээмсэглэлтэй тайзан дээр алхаж байснаа санадаг.

-Таны хувьд загварын салбарт ажилласнаар олж авсан үнэт зүйл нь юу байсан бэ?

                -Олон нийтийн газар хэрхэн биеэ зөв авч явах, хувцастай зөв харьцаж, хэрэглэх гээд олон зүйлийг загвар өмсөгчөөр ажилласнаараа сайн сурсан гэж боддог. Ингээд бодоход эмэгтэй хүний дотоод гоо зүй талаасаа олон зүйл сурч, өөрийгөө хөгжүүлсэн юм байна. Ер нь би өөрийгөө хойш тавьж, голох дургүй. Би хүсэж, хичээх юм бол чадна гэдгээ мэддэг. Тиймээс “Өөрийгөө бусадтай харьцуулж, голдог хүн байж болохгүй шүү” гэдгийг хүмүүст хэлэхийг хүсдэг.

-Б.Өэлүн ирээдүйгээ хэрхэн төсөөлж байгаа вэ. Дараагийн зорилго, төлөвлөгөөнөөсөө хуваалцахгүй юу?

                -Багадаа үзэж өссөн болохоор тэр ч юм уу “Victoria's Secret”-ийн загвар өмсөгчид шиг болохыг хүсдэг байсан. Ирээдүйд олон улсын загварын тайзан дээр  дахин Улсынхаа нэрийг гаргахыг хүсч, зорьж байна. Алдартай загвар зохион бүтээгчдийн хувцсыг тайзан дээр “амилуулдаг” болохыг зорьж байна.

-Ярилцлага өгсөн танд баярлалаа.

                -Баярлалаа.     

 


Б.ӨЭЛҮН: Ээжийнхээ мөрөөдлийг биелүүлж загвар өмсөгч болсондоо баяртай байдаг
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188