Цаг агаарын төлөв байдал ойрын өдрүүдэд буюу гуравдугаар сарын 18-нд баруун аймгуудын нутгийн зарим газар, төвийн аймгуудын ихэнх нутгаар, гуравдугаар сарын 19-нд баруун аймгуудын нутгийн зүүн, төв болон зүүн аймгуудын нутгийн өмнөд, говийн аймгуудын нутгийн хойд хэсгээр, гуравдугаар сарын 20-нд нутгийн зүүн өмнөд хэсгээр цас орж, цасан шуурга шуурах төлөвтэй байна.

Гуравдугаар сарын 21-нээс ихэнх нутгаар хүйтний эрч суларна

Салхи энэ сарын 18-19-нд нутгийн зарим газраар 15-17 м/с хүртэл ширүүсч, шороон шуурга шуурна. Гуравдугаар сарын 18-нд нутгийн хойд хэсгээр, 19, 20-нд ихэнх нутгаар хүйтэрч, Увс нуур болон Дархадын хотгор, Тэс голын хөндийгөөр шөнөдөө 23-28 градус, өдөртөө 10-15 градус, Хангай, Хөвсгөл, Хэнтэйн уулархаг нутаг, Завхан голын эх, Идэр, Орхон, Хараа, Ерөө, Хэрлэн, Туул, Тэрэлж, Халх голын хөндийгөөр шөнөдөө 18-23 градус, өдөртөө 5-10 градус, говийн бүс нутгийн өмнөд хэсгээр шөнөдөө 6-11 градус хүйтэн, өдөртөө 0-5 градус дулаан, бусад нутгаар шөнөдөө 13-18 градус, өдөртөө 1-6 градус хүйтэн байна.