Архангай аймагт бэлэн байдлын зэрэглэлийг бууруулж, өндөржүүлсэн бэлэн байдалд өнөөдрөөс шилжиж байна. Өчигдөр буюу нэгдүгээр сарын 11-нд аймгийн Онцгой комисс өргөтгөсөн хуралдаан зарлаж, зочид буудал, фитнес, цанын бааз зэрэг газрын үйл ажиллагааг нээхээр болжээ. Энэ талаар Архангай аймгийн ЗДТГ-ын хэвлэлийн төлөөлөгч С.Батзаяагаас тодрууллаа.

-Архангай аймагт хөл хориог сулруулж, зарим үйлчилгээний байгууллагын үйл ажиллагааг хэвийн явуулахаар болжээ.  УОК-оос орон нутагт гуравдугаар сарын 31 хүртэл хөл хорио тогтоох чиглэл өгсөн. Гэтэл яагаад хөл хориог сулруулж байгаа юм бэ?

-Манай аймагт коронавирусийн халдвар илэрч бүх нийтийн бэлэн байдлын зэрэгт шилжээд байсан юм. Аймгийн онцгой комиссын хуралдаанаар халдварын голомтыг хумьж, бэлэн байдлын зэрэглэлийг өнгөрсөн арванхоёрдугаар сард нэг шат бууруулсан. Ингээд зарим үйлчилгээний байгууллагын үйл ажиллагааг хэвийн явуулахаар болсон байгаа. Тухайлбал, бараа үйлчилгээний төв, үсчин зэрэг байгууллагын үйл ажиллагааг нээсэн. Өчигдөр Аймгийн онцгой комисс дахин хуралдаж, зарим үйл ажиллагааг нээх тухай хэлэлцлээ. Үүнд зочид буудал, фитнес, цанын бааз зэргийг нээн ажиллуулах юм. Харин архи согтууруулах ундаагаар үйлчилдэг баар, цэнгээний газар, заал нээхгүй. Мөн хурал цуглаан зохион байгуулах, урлаг соёлын үйл ажиллагааг хориглоод байна.

-Фитнесийн үйл ажиллагааг нээсэн хэрнээ яагаад заалыг нээгээгүй юм бэ?

-Хурлын үеэр дээрх асуудлыг хэлэлцсэн. Энэ үеэр зааланд байгаа хүмүүс халдвар хамгааллын дэглэм баримтлах нь эргэлзээтэй. Харин фитнесийн газрууд  шүршүүртэй, халдвар хамгааллын дэглэм баримтлах боломжтой учраас эрсдэл багатай гэж үзсэн. Бид шат дараатайгаар арга хэмжээ авч, АОК-ын шийдвэрийн дагуу шуурхай штаб ажиллаж байна.

-Аймгийн хэмжээнд орох, гарах хөдөлгөөнийг хэрхэн зохицуулж байгаа вэ?

- Манай аймгийн хэмжээнд 19 сум руу орох, гарах хөдөлгөөн хэвийн байгаа. Харин иргэд Улаанбаатар хот руу гарах бол ямар шалтгаанаар явж байгаа, буцаж ирэх эсэхийг тодруулж, хөл хорионы дэглэмээ сахих шаардлага тавьж, нэн шаардлагатай иргэдийг явуулж байна. Улаанбаатараас орон нутгийн иргэдийг гаргах, оруулах асуудал АОК-ийн шийдвэрээр явахгүй. Харин нийслэлээс хүнс, шатахуун түгээж буй автомашиныг нэвтрүүлнэ. Гэхдээ тээвэр хийж буй жолоочийг өндөр шаардлагын дагуу халдвар хамгааллын дэглэм бариулж, PCR шинжилгээний хариу үндэслэн тээвэр хийлгэдэг.