Манай улсын ойн сан бүхий газар 18.5 сая.га буюу нийт нутаг дэвсгэрийн 11.8 хувийг эзэлдэг байна. Үүнээс 12.3 сая га нь ойгоор бүрхэгдсэн хэвийн ургаж байгаа аж. Салбарын судлаачид Монгол орны хамгийн хөгшин мод Завхан аймгийн Их-Уул сумын нутагт байгааг тогтоожээ. Тус мод нь 700 гаруй жилийн настай, 1.8 метр бүдүүн шинэс мод юм байна.

Харин Монгол орны хамгийн өндөр мод Хөвсгөл аймгийн Ринченлхүмбэ суманд бүртгэгджээ. Тус мод нь 42 м урттай юм байна. 

Ой мод нь хуурай газрын бүх амьтан, ургамлын 80 орчим хувийн амьдрах орчин болдог. Мөн ой мод нь хүлэмжийн хийг шингээж, агаарыг цэвэршүүлдэг “Дэлхийн уушиг” юм. Мод хоногт 180 л хүчилтөрөгч ялгаруулдаг. Нэг га навчит ой гурван кг, шилмүүст ой 5-10 кг, арц 30 кг фитонцит ялгаруулдаг байна. Ой модны фотосинтезийн процессын явцад нэг га шилмүүст ой зуны нэг өдөр агаараас 220-275 кг нүүрс хүчлийн хий шингээж, 180-215 кг хүчил төрөгчийг ялгаруулж, 120-150 кг органик бодисыг нийлэгшүүлж байдаг.