Угаарын хийгээр өнгөрсөн онд 26 хүн хордож амиа алджээ

2023-01-27, 326

Угаарын хийд хордож, амь нас эрүүл мэндээрээ хохирсон гэх дуудлага 2022 онд 457 бүртгэгджээ. Мөн хүний амь нас хохирсон 26 тохиолдол бүртгэгдсэн байна. Он гарснаас хойш 3 хүний амь нас хохирсон дуудлага цагдаагийн байгууллагад бүртгэгджээ. Шалтгаан, нөхцөлийг цагдаагийн байгууллагаас судалж үзэхэд хувь хүний өдөр тутмын дадал, амьдралын хэв маягаас шалтгаалж угаарын хийн хордлогод өртөж амь насаа алдах, эрүүл мэндээрээ хохирох асуудлууд гарч байна. Тухайлбал, зуух, ханан пийшин эвдэрсэн, битүүмжлэл муутай, зуух яндангийн холбоос засвартай, яндан их хэмжээний хөө тортогтой, түлш буруу түлсэн гэх зэргээс шалтгаалжээ.

Засгийн газрын шийдвэрийн дагуу нийслэлийн гэр хорооллын 200 мянган өрхөд угаарын хий мэдрэгч төхөөрөмж суурилуулсан. Угаарын хий нь өнгөгүй, үнэргүй, амтгүй учир иргэд өөрсдийгөө угаартаж байгаагаа мэдэх боломжгүй. Харин угаарын хий мэдрэгч төхөөрөмж угаарын хийг мэдрэн дохио өгдөг. Тиймээс айл, өрхүүдийг угаарын хий мэдрэгчээ тогтмол ажиллуулахыг зөвлөж байна.

Угаарын хий мэдрэгч төхөөрөмж нь улаан, ногоон, шар гэсэн гурван өнгийн гэрэлтэй. Ердийн үед 30 секунд тутамд ногоон өнгийн гэрэл асна. Энэ нь тухайн төхөөрөмж хэвийн ажиллаж байна гэсэн үг. Шар гэрэл анивчиж байвал төхөөрөмж алдаа заасан, улаан гэрэл анивчиж дохиолол дуугарвал тухайн орчинд угаар байна гэсэн үг. Төхөөрөмжид улаан гэрэл асаж, дуут дохио өгсөн тохиолдолд иргэд гэрийнхээ агаарыг сэлгэх, угаарын хийн агууламжийн найрлагыг дэлгэц дээр гарч буй тоон үзүүлэлтээс зөвлөгөөг харах хэрэгтэй. Зай нь дууссан бол аюулгүй байдлаа хангаж яаралтай солих шаардлагатай.

Угаарын хийгээр өнгөрсөн онд 26 хүн хордож амиа алджээ

Шинэ мэдээ

Нийтлэлчид