Энэ долоо хоногт ихэнх нутгаар хүйтний эрч чангарч, цасан шуурга шуурна гэх мэдээлэл бий. Бид энэ талаар Цаг уур, орчны шинжилгээний газрын цаг уурч О.Эрдэнэтуяагаас тодрууллаа.

            Тэрбээр “Арваннэгдүгээр сарын 28-наас арванхоёрдугаар сарын 2-ныг хүртэл хугацаанд ихэнх нутгаар хүйтний эрч эрс чангарах урьдчилсан төлөвтэй байна. Тиймээс ЦУОШГ-ээс иргэд, хөдөө орон нутгийн малчдад сэрэмжүүлэг гаргасан.  Баруун бүсийн зуд болох магадлалтай зарим  аймгуудад илүүтэй анхаарч ажиллахыг холбогдох албан байгууллагуудад зөвлөсөн.

 Дархадын хотгор, Хэнтийн уулархаг нутаг, Хүрэнбэлчир орчим, Завхан голын эхээр шөнөдөө -42...-47 хэм, өдөртөө -29...-34 хэм, Монгол-Алтай, Хангай, Хөвсгөлийн уулархаг нутаг, Эг, Үүр, Идэр, Тэс, Туул, Тэрэлж голын хөндийгөөр шөнөдөө -36...-41 хэм, өдөртөө -24...-29 хэм, говийн бүс нутгийн өмнөд хэсгээр шөнөдөө -18...-23 хэм, өдөртөө -9...-14 хэм, бусад нутгаар шөнөдөө -29...-34 хэм, өдөртөө -19...-24 хэм хүйтэн байх төлөвтэй байна.

            Улаанбаатар хот орчимд арваннэгдүгээр сарын  28-нд цас орж,  28-наас арванхоёрдугаар сарын 01-ний өдрүүдэд хүйтний эрч эрс чангарч, шөнөдөө Яармаг-Сонгины орчмоор -39...-41 хэм, бусад хэсгээр -32...-34 хэм, өдөртөө -23...-25 хэм хүйтэн байх төлөвтэй байгаа” гэлээ.