Өчигдөр хэвлэл мэдээллийн зарим хэрэгсэл, мэдээллийн сайтаар “Сэлэнгэ аймгийн  Мандал суманд амьдардаг айлын өвөлжөөнд баавгай орж мал барьжээ” гэсэн гарчигтай бичлэг цацаж, олон нийтийг багагүй сандаргаад авсан. Үүгээр ч зогсохгүй “Баруун аймгуудаар дүүрэн баавгай бэлчиж байна гэнэ. Болгоомжтой яваарай” гэх тайлбартай сэрэмжлүүлэг хүртэл хүргэсэн. Тус бичлэг дээрх хар хүрэн баавгай айлын хашаанд орж, хонь барьж байгаа нь бичигдсэн байсан юм. Мөн малын эзэн хашаа руугаа буудахад баавгай түүн рүү дайрч байгаа нь бичигдэн үлджээ. Иргэд тус бичлэгийг үзээд “Хүмүүсийн буруутай үйлдлээс болж баавгай идэш тэжээлийн дутагдалд оржээ. Энэ жил самар их ургасан хэдий ч уулаар дүүрэн хүн байгаа учраас арга буюу айлын хоттой мал руу дайрч байна. Яана аа, малын эзэн зүгээр байгаа” гэх зэрэг сэтгэгдэл үлдээж, сэрэмжлүүлэг нь амнаас ам дамжин өнөөдөр ч цацагдсаар байна.

Харин уг бичлэгийн эх хувийг гурван хоногийн өмнө ОХУ-ын Гороской хотын “Анчид, загасчид” гэсэн фэйсбүүк группт нийтэлсэн байна. Ингэхдээ Эдгэр Давидс гэх эрэгтэй “Үүнийг яах вэ” гэсэн тайлбартайгаар оруулжээ.