Хуш модны самрыг иргэд ахуйн болон үйлдвэрлэлийн зориулалтаар ашиглах, бэлтгэхдээ харьяа газрынхаа байгаль орчны асуудал эрхэлсэн төрийн захиргааны байгууллагаас тусгай зөвшөөрөл авдаг. Энэ жилийн хувьд нийслэлийн хэмжээнд 361 иргэн, орон нутагт найман аймгийн 25 суманд хуш модны самрыг үйлдвэрийн болон ахуйн зориулалтаар бэлтгэх зөвшөөрөл авчээ. Гэвч тусгай зөвшөөрөлтэй иргэдээс гадна зөвшөөрөлгүй хэдэн мянган иргэн хууль бусаар самар түүж буй. Ингэхдээ хуш модыг мунадах, мөчрийг нь хугалах зэргээр гэмтээдэг нь байгаль орчинг хохироож байгаа юм. Үүний эсрэг холбогдох байгууллагууд хяналт шалгалт хийж  байгаа ч хууль бус самарчдыг зогсоож чадахгүй байна.

Тухайлбал Нийслэлийн байгаль орчны газраас өнгөрсөн сар гаруй хугацаанд 500 гаруй иргэнийг уулнаас буулгажээ. Мөн Экологийн цагдаагийн алба, НМХГ зэрэг холбогдох байгууллага хамтран Богдхан ууланд хяналт шалгалт хийж, 522 иргэнийг уулнаас буулган, торгууль ногдуулж, 34 шуудай самрыг байгальд нь устгасан байна.

Хууль бус самарчдын дунд бага насны хүүхдээ дагуулсан эмэгтэй, бүр жирэмсэн эмэгтэй ч байдаг талаар хяналт, шалгалт хийж буй албаныхан хэлсэн. Нэг талаас хоногийн хоолоо залгах гэсэн иргэд хүүхдээ дагуулаад ч хамаагүй ууланд даарч бээртлээ самар түүж явааг нь буруутгах аргагүй. Гэвч нөгөө талаас байгаль орчны хууль ноцтой зөрчигдөж, хуш мод эргэн сэргэхээргүйгээр гэмтэж байгаа юм.