Цахим орчинд гадаад улсын иргэд зөвшөөрөлгүй аргаль  агнаж байна гэсэн тайлбартайгаар  зураг, дүрс бичлэг нийтлэгдсэн. Тэгвэл энэ талаар Байгаль орчин аялал жуулчлалын яамны хэсгийн дарга П.Цогтсайханаас тодрууллаа.

Тэрбээр “Амьтны тухай хуулийн 26 дугаар зүйлийн нэгт зааснаар тухайн жилд  гадаадын иргэнд агнуулах амьтны тоог заадаг. Энэ жилийн хувьд угалз 98, тэх 130, халиун бага 60, бор гөрөөс 30, цагаан зээр 300, агнуурын шувуу 200, саарал чоно 20 болон 550 толгой тул загас бариулаад буцаагаад тавиулахаар тогтоосон. Энэ олон хууль бус ан биш албан ёсны зөвшөөрөлтэй спорт агнуур. Гадаадын иргэд Монгол Улсад ан хийхдээ улс, аймгийн төсөвт хураамж төлдөг. Угалз 24000 ам.доллар, говийн угалз 14000 ам.долларын төлбөр төлдөг. Энэ бол аялал жуулчлалын нэг хэлбэр. Тус “ShikarSafaris” бол олон улсын анчдын жуулчилдаг байгуулга. Спорт агнуур цар тахалтай холбоотойгоор хоёр жил завсардсан байсан” гэв.