Архангай аймгийн Тариат суманд анхлан төрөгч эх сумын эмнэлгийн жорлонд амаржжээ. Тодруулбал, анхны төрөлтөөр 3200 гр жинтэй хүү төрүүлсэн эх жорлонд амаржиж, доош унасан нярайг сумын хэсгийн төлөөлөгч, дэслэгч Б.Халзан аварчээ. Одоогоор эх, хүүхдийн биеийн байдал сайн байгаа бөгөөд сумын эмнэлэгтээ хэвтэн эмчлүүлж байгаа аж.

Нярайн амийг аварсан Архангай аймгийн Тариат сумын хэсгийн төлөөлөгч, дэслэгч Б.Халзангаас зарим зүйлийг тодрууллаа.

-Дөнгөж төрсөн нярайн амийг аварчээ. Таныг дуудлагаар очиход нөхцөл байдал ямар байсан бэ?

-Өнгөрсөн даваа гараг буюу гуравдугаар сарын 15-ны 11:00-12:00 цагийн орчимд манай цагдаагийн хэлтэст  “Модон жорлонд нярай хүүхэд унасан” тухай дуудлага ирсэн. Намайг очиход хүүхэд жорлон дотор уйлсан байдалтай, хүмүүс тойрчихсон байж байсан. Сумын эмнэлэг цагдаагийн байр хоорондоо ойрхон учраас дуудлага аваад 2-3 минутын дараа очсон. Хүүхдийн унасан модон жорлон 3-4 метрийн гүнтэй байсан байх аа. Битүү хөлдчихсөн учраас хажуу талынх нь банзан дээр гишгэж, дамжиж буусан. Цаг алдалгүй аврах ёстой байсан учраас шат олдоогүй.

-Хүүхэд гэмтэж, бэртсэн болов уу?

-Бие нь хөх болчихсон байсан. Хүүхэд маш чангаар уйлаад байсан болохоор жорлонгоос бушуухан гаргаад, эмнэлгийн байгууллагад хүлээлгэж өгсөн. Тэгээд хүүг эмнэлэг рүү аваад орсон. Тэрнээс хойш ээж, хүүхэдтэй уулзаагүй. Ер нь намайг очиход ээжийг нь эмнэлэг рүү аваад орчихсон байсан юм шиг байна лээ. Ямар хүн төрснийг нь ч мэдэхгүй. Ямар ч гэсэн анхны төрөлт л гэсэн. Эмнэлгийн байгууллагаас “Эх, хүүхдийн биеийн байдал сайн байгаа” гэх мэдээг өгсөн.

            -Танай сумын эмнэлэг дотроо ариун цэврийн өрөөгүй юм байх даа?

-Тэрийг би сайн мэдэхгүй. Би сумандаа томилогдоод нэг жил орчим болж байгаа. Шинэ эмнэлэгтэй болсон учраас эмнэлэг рүү орж ч үзээгүй л явна.

-Та өмнө ийм төрлийн дуудлагад явж байв уу? 

-Ажил минь учраас янз бүрийн л дуудлагад явж байсан. Хүний амьтай холбоотой ч дуудлага байсан. Гэхдээ анх удаа нялх хүүхдийн амь аварсан. Тэр дундаа дөнгөж төрсөн нярай модон жорлонд унасан болохоор их сандарлаа.