-Нэг ч болтугай хүний амь аврах юм сан гэж хичээсэн-

       Дүрэлзсэн улаан галаас хүний амь аварсан цагдаагийн алба хаагчийг Эргэлт.мн мэдээллийн сайт “Түүчээ” буландаа онцоллоо. Оны эхний өдөр буюу нэгдүгээр сарын 1-нд Сонгинохайрхан дүүргийн Цагдаагийн I хэлтсийн Нийтийн хэв журам хамгаалах тасгийн эргүүлийн офицер, цагдаагийн дэслэгч Б.Балжинням, эргүүлийн цагдаа, жолооч Д.Лхагважав нар Сонгинохайрхан дүүргийн 34 дүгээр хорооны нутаг дэвсгэрт ажил үүргээ гүйцэтгэж явахдаа байшингийн дээврээс гал гарч байхыг харжээ. Ийн түргэн шуурхай очиж, галаас 13 настай хүү Б-г аварчээ. Эрэлхэг хоёр цагдаагийн нэг болох Сонгинохайрхан дүүргийн Цагдаагийн I хэлтсийн Нийтийн хэв журам хамгаалах тасгийн эргүүлийн офицер, цагдаагийн дэслэгч Б. Балжиннямтай ярилцлаа.

-Юуны өмнө танд хүний амь аварсанд баяр хүргэе. Тухайн үед ямар үйл явдал болсон  бэ?

-Баярлалаа. Сонгинохайрхан дүүргийн 34 дүгээр хорооны Баянголын амын задгай гэдэг газар ажил үүргээ гүйцэтгэж явахдаа айлын байшингийн дээвэр шатаж байхыг хараад хамтрагчтайгаа яаралтай очсон юм. Хамтрагч маань хашаа давж, хаалга онгойлгосон. Байшингийн гадна талын бүргэд хаалга түгжээгүй байлаа. Харин дотор талын модон хаалгыг түлхэж, хаалганы түгжээг эвдэж орсон. Байшин битүү утаа болчихсон, дээвэр нь шатаад хэзээ мөдгүй унахад бэлэн байсан. Утаа ихтэй байсан учир хүн байгаа эсэх нь сайн мэдэгдээгүй. Сайтар анзаарч зогссоны эцэст орон дээр нэг хүүхэд унтаж байгааг харсан. Тэгээд хүүг галаас аварч, тэр даруй хөрш айлын оршин суугчдыг дуудаж, хөргөгч, зурагтыг нь гаргаж байтал дээвэр нурж эхэлсэн. Өөр эд зүйлсийг галаас гаргаж чадаагүй. Байшин мөн ашиглах боломжгүй болтлоо шатсан.

-Хэдэн цагийн үед хүүг галаас аварсан бэ. Аав, ээжид нь болсон үйл явдлыг хэзээ, хэрхэн хэлэв?

-Өдрийн 12:00 цагийн үед хүүг галаас аварсан. Хүүг авч гарч ирээд, аавынх нь утасны дугаарыг асууж, гэр нь шатаж байгааг дуулгасан юм. Ингэхдээ хүүхдийг нь аварч чадсан гэдгээ хэлсэн. 13 настай Б-гийн эмээгийн бие тааруу учир асрахаар аав, ээж нь өглөө эрт явсан юм билээ. Тэгээд хүүхдээ унтаж байхаар нь үлдээгээд явсан гэсэн.

-Гал юунаас болж гарсан бэ?

-Галын дүгнэлтээр дэлгэрэнгүй мэдээлэл гарна. Урьдчилсан байдлаар яндангаас улбаатай гал гарсан гэж үзэж байгаа. Өнөө, маргаашнаас мэргэжлийн хүмүүсийн хийсэн дүгнэлт гарна.

-Галаас аварсан хүүгийн бие, сэтгэл санаа ямар байна вэ?

-Тухайн үед хүүхэд бага зэрэг угаартчихсан, шоконд орсон байсан. Анхан шатны тусламж үзүүлж, сүү уулган, хорыг гадагшлуулж, тайвшруулах арга хэмжээ авсан. Одоо бага зэргийн айдастай байгаа.

-Та хэдэн жил мэргэжлээрээ ажиллаж байна вэ. Та бүхэнд ямар нэгэн гэмтэл, хохирол учирсан уу?

-Би мэргэжлээрээ ажиллаад гурван жил болж байна. Бидний бие зүгээр. Би өргөсөн тангаргаа биелүүлж, үнэнчээр зүтгэж явна. Тухайн үед нэг ч болтугай хүний амь аврах юм сан гэж маш их хичээсэн дээ.

-Та өмнө нь хүний амь аварч байв уу. Галын аюулаас хүн аврахын тулд ямар арга техник ашиглаж, сэтгэл зүйгээ хэрхэн бэлдсэн бэ?

-Би анх удаа хүний амь аварлаа. Гал гарч буй байшинд орохдоо дотор нь хэдэн хүн байгаа бол, хүн бэртэж, гэмтэхээс өмнө аврах юм сан гэж бодсон. Тухайн үед 13 настай хүүг аварч чадсан ч сэтгэл эмзэглэж байсан. Өөрийн үр хүүхэдтэйгээ зүйрлэж, хайрлаж, энэрэх сэтгэл төрдөг юм билээ. Хүний амь аварчихаад өргөсөн тангарагтаа үнэнч байж, эх орон, хүн ардынхаа төлөө зүтгэх юм шүү гэж бодож, мөн өөрөөрөө бахархаж байлаа.