Дүрэлзсэн улаан галаас хүний амь аварсан цагдаагийн алба хаагчдыг Эргэлт.мн мэдээллийн сайт “Түүчээ” буландаа онцоллоо. Өнгөрсөн бямба гарагт “Сонгинохайрхан дүүргийн 24 дүгээр хорооны .. тоотод байшин шатаж байна” гэх дуудлага цагдаагийн байгууллагад иржээ. Дуудлагын дагуу тус дүүрэг дэх Цагдаагийн газрын II хэлтсийн эргүүлийн офицер, цагдаагийн дэслэгч А.Энхцолмон, эргүүлийн цагдаа жолооч, цагдаагийн ахлах ахлагч Х.Батбаяр нар түргэн шуурхай ажиллаж, галаас иргэн Б-г аварчээ. 

 

-Хүний амь аварсан тань баяр хүргэе. Тухайн үед юу болсон талаар мэдээлэл өгөөч?

 

-Н.Б: Аравдугаар сарын 31-ний 22:05 цагт “Хоёр давхар байшин шатаж байна” гэсэн дуудлага ирсэн. Хаяг нь Сонгинохайрхан дүүргийн 24 дүгээр хороо Баянхайрханы VIII гудамжны ... тоот гэсэн байв. Дуудлага авснаас хоёр минутын дараа шатаж байгаа байшингийн үүдэнд бид очсон. Очиход байшингийн үүдэн хэсгээс гал гарсан бололтой гал улам дэлгэрч, дүрэлзэж байлаа. Үүдээр нь орох боломжгүй байсан учраас дотор нь хүн байгаа эсэхийг шалгаж үзэхээр байшинг тойрч үзсэн. Том өрөөнийх нь цонхоор харахад шалан дээр бараан өнгийн хувцастай хүн хэвтэж байгаа харагдсан. Цонхыг нь манай дэслэгч тохойгоороо хоёр удаа цохиж, хагалаад бид дотогш нэвтэрсэн. Тэгээд угаартаж унасан иргэнийг гаргаж ирээд, анхан шатны тусламж үзүүлээд, 103-т хүлээлгэж өгөөд явсан. 

 

-А.Э: Дуудлага хүлээн авчихаад очиж байхдаа “Дотор нь хүн байхгүй байгаасай” гэж бодож байсан. Хэрэв байвал амьд л байгаасай гэж бодон яарсаар очсон. Очоод байшингийн гадаа зогсож байгаа хүмүүсээс хамгийн түрүүнд “Дотор хүн байгаа юу” гэж асуусан. Хажуунаас нэг эмэгтэй “Нэг хүн байх шиг байна. Хальт харагдаад газар уначих шиг боллоо” гэсэн. Тэгээд цонхыг нь хагалаад, хоёулаа хамт байшин руу орсон. Байшингийн цонх нь том байсан учраас хүн багтах хэмжээгээр хагалж орсон. 

 

-Амийг нь аварсан хүний биеийн байдал одоо ямар байгаа вэ. Гал юунаас болж гарсан гэнэ вэ?

 

 

-А.Э: Биднийг угаартсан иргэнийг байшингаас гаргахад ямар ч ухаангүй байсан. Бид хамгийн түрүүнд гадуур хувцсыг нь тайлаад, хиймэл амьсгаа хийсэн. Угаартсан хүний хувцсыг нь тайлахгүй бол хувцаснаасаа угаартаад байдаг талтай. Гал чухам юунаас болж гарсныг мэдэхгүй. Бид ээлжнээс өчигдөр (уржигдар) өглөө л буусан болохоор аварсан хүнтэйгээ уулзаж амжаагүй байна. Ямар ч гэсэн биеийн байдал нь сайжирч, хэвийн болж, мэдүүлэг өгсөн гэсэн. 

 

-Н.Б: Гал гардаг өдөр угаартсан хүн гэртээ ганцаараа байсан юм билээ. Эхнэр, хүүхэд нь сургуулийн арга хэмжээнд оролцох гээд явчихсан байсан гэсэн. Байшин дотор юм тэсэрч, дэлбэрч байгаа чимээ гарч байсан болохоор бушуухан л хүнээ гаргасан. Байшингийн гадна зогсож байсан хүмүүс ямар нэгэн зүйл хүчтэй дэлбэрч байгаа нь сонсогдсон гэсэн. Галын урьдчилсан дүгнэлтийг бид хэлэх боломжгүй, тогтоох ёстой газар нь тогтоох байх. Биднийг хүнээ галаас гаргаж ирээд долоон минут болж байхад түргэн тусламж, гал унтраах ангийн алба хаагчид ирсэн. Бид хэрэв жаахан удсан бол түүний амь эрсдэж мэдэхээр байсан. Харин азаар бид дуудлага хүлээн авахдаа тэр айлаас холгүй явж таарлаа. 

 

-Та хоёр цагдаагийн байгууллагад 10 гаруй жил ажиллаж байгаа юм байна. Өмнө нь иймэрхүү тохиолдолтой олон таарч байв уу?

 

-Н.Б: Цагдаагийн байгууллагад 18 жил ажиллахдаа энэ тохиолдол шиг дүрэлзсэн галаас хүний амь аварч байгаагүй. Харин 20 настай охиныг угаартсан байхад нь аварч байсан. Тэр дуудлагыг хүлээн аваад очиход мөн л хаалгаар орох боломжгүй, хаалга нь цоожтой байсан учраас цонхоор нь орж байсан.

 

-А.Э: Хэдхэн хоногийн өмнө угаарын хийн дуудлагад очсон. Анх 103 дугаарын утсанд дуудлага ирсэн юм билээ. Гэтэл дуудлага өгсөн хүний гэрийн хаягийн ойролцоо очиход утсаа авахаа больчихсон гэсэн. Тэгээд эмч нь манайх руу дуудлага өгөөд бид хамт очсон хэрэг. Хэргийн газарт очиход яндангаа аваад өрхөө татаад гэрийн эзэн болох гурван иргэн шалан дээрээ ухаан алдаад уначихсан байсан. Нэг хүнийх нь амнаас цагаан хөөс гараад, хүнд байдалтай байв. Эмчтэй хамт явж байсан тулдаа цаг алдалгүй анхан шатны тусламж үзүүлж, амийг нь аварсан. 

 

-Цагдаагийн байгууллагатай амьдралаа хэрхэн холбож байсан юм бэ. Цаг наргүй энэ албанд зүтгэх эрч хүчийг хаанаас авдаг вэ?

 

-А.Э: Би 2006 оны долдугаар сараас цагдаагийн байгууллагад үүрэг гүйцэтгэж байна. Манай өвөө цэргийн хүн байсан учраас багаасаа л цагдаа, цэргийн байгууллагад ажиллах мөрөөдөлтэй байсан. Мөрөөдлөө биелүүлж, албандаа зүтгэж яваадаа цаг ямагт талархдаг. Мөн албан үүргээ гүйцэтгэж явахдаа нэг хүний ч болтугай амь аварсандаа баяртай байгаа. Мөн миний хамтрагч байгаагүй бол аврах ажиллагаанд оролцож, хүний амь аврахад хэцүү. Бүх л зүйлээ хоорондоо ярилцаж, зөвлөлддөг. Сая гэхэд л “Цонхыг нь хагалах уу” гэж хүртэл асуух жишээтэйгээр хамтарч ажилладаг. Хэдийгээр би офицер ч ахлагчаас суралцах, зөвлөх зүйл олон. Анхнаасаа зорьж орсон албандаа ажилласан шиг ажиллаж, үүргээ нэр төртэй биелүүлэх юм сан гэж бодож явдаг даа. Ар гэрийнхэн, үр хүүхдэдээ дурсагдах дурсамжтай, сайн аав, аав, ээжийн сайн хүү байх юм сан гэж боддог. 

 

-Н.Б: Өргөсөн тангарагтаа үнэнч, зорьсон зорилгодоо хүрэх юм сан гэж дандаа боддог. Албан үүргээ амжилттай гүйцэтгэж, хүний амь аврах шиг сайхан зүйл алга. Нэг айл ч гэсэн элэг бүтэн байгаад баяртай байна. Хэрэв бид очоогүй бол өнөөдөр ямар нөхцөл байдалтай байх талаар төсөөлөхөд л зүрх халширмаар байна. 

 

-Бидэнтэй цаг гарган ярилцсан та бүхэнд баярлалаа. Ажлын амжилт хүсье.

 

-Баярлалаа. Хүйтний улирал эхэлсэн энэ үед ард, иргэдийг сонор сэрэмжтэй байхыг анхааруулмаар байна.