Г.Ширэндэв: Жаахан л цаг алдсан бол голд гацсан 26 хүн машинтайгаа живэх байсан

Д. Чанцалдулам:
Монголчуудын амьдрал- Түүчээ

2020-11-02, 3429

Хөвсгөл аймгийн Эрдэнэбулган сумын Үүрийн голд гурван тээврийн хэрэгсэлтэй нутгийн 26 иргэн усанд урсаж, амь эрсдэх аюулд орсон тухай мэдээллийг тус сумын хэсгийн цагдаа цагдаагийн ахлагч Г.Ширэндэв хүлээн авч, нутгийн иргэдийн хамт цаг алдалгүй очсон байна. Усны голд хөдлөх боломжгүй болсон тээврийн хэрэгслүүдийг уснаас татаж гарган, иргэдийн амь, эрүүл мэнд, эд хөрөнгийг авран хамгаалжээ. Цагдаагийн ахлагч Г.Ширэндэвтэй ярилцлаа.

-Цагдаагийн байгууллагад хэдэн жил ажиллаж байна вэ. Орон нутагт ажиллах ямар байна?

-Цагдаагийн байгууллагад долоо дахь жилдээ ажиллаж байна. Анх Дотоодын цэргийн 805 дугаар ангиас ажлын гараагаа эхлүүлээд, Чингэлтэй дүүргийн Цагдаагийн газрын II хэлтэст ажиллаж байгаад 2018 онд Эрдэнэбулган суманд томилогдож ирсэн. Би Хөвсгөлийн нутгийн унаган хүүхэд болохоор өөрийнхөө хүсэлтээр орон нутагтаа ажиллахаар ирээд байна. Нийслэл, орон нутагт ажиллахад ялгараад байх юм байхгүй. Ачааллын хувьд орон нутаг зарим үед илүү хүнд байдаг байх. Учир нь, суманд 2-3 цагдаа байдаг болохоор хүн ам ихтэй суманд нэлээн хариуцлагатай ажиллах шаардлагатай. Харин эхнэр, хүүхэд минь орон нутагт ажлын байр байхгүйгээс болоод Улаанбаатар хотод амьдардаг. Энэ л жаахан хэцүү. Бусдаар бол болж байна аа.

-Өөрийг тань албан үүргээ гүйцэтгэж яваад 26 хүний амь аварсан талаар сонссон. Тухайн үед юу болсон талаар ярихгүй юу?

-Өнгөрсөн аравдугаар сарын 27-ны 07:00 цагийн үед манай хэсэгт “Сумын төвөөс 40 гаруй километрийн зайтай байрлах Үүрийн голд гурван машин суучихсан байна. Голд суусан машин дотор 20 гаруй хүн хүнд байдалд байна” гэсэн дуудлага ирсэн. Голоос машинуудыг гаргахын тулд сумын том тэрэгтэй Н.Даваадорж гэж жолоочийг гуйгаад аваад явсан. Очиход нэг пургон, хоёр УАЗ-69 маркийн автомашин голын дунд гацсан байсан. УАЗ-69 маркийн авто машинд сууж явсан найман хүн машиныхаа дээвэр дээр суучихсан байсан бол пургоны зорчигчид машинаасаа гарах боломжгүй байсан.

Тэд хамгийн урд талд нь явж байсан болохоор гүнзгий хэсэгт нь суучихсан, машиныхаа хаалгыг онгойлгох гэхээр ус орж ирэх гэж байсан гэсэн. Биднийг очиход машиных нь шалаар ус дүүрчихсэн байсан даа. Тэр хүмүүсийн байдал хүнд, машинтайгаа хэзээ мөдгүй живэх гээд байсан тул манай том машины жолооч хүчээр голын мөсийг хагалж, хажуунаас нь очиж, хүмүүсийг аюулгүй болгосон. Мөн машины дээвэр дээр сууж байсан хүмүүсийг тэвшин дээрээ суулгаад голын захад хүргэсэн. Тэгээд үүний дараа нь машинуудыг голоос гаргасан. Манай Хөвсгөл аймгийн Эрдэнэбулган сум гурван цагдаатай. Тухайн өдөр Эрүүгийн цагдаагийн газраас шалгалт ирсэн учир хэсгийн төлөөлөгч маань аймгийн төв рүү явчихсан байсан. Экологийн байцаагч маань зэргэлдээх суманд эргүүлд гарчихсан учир би сумандаа ганцаараа байсан юм.

-Хүмүүс голд суугаад хэр удсан юм бэ. Их даарсан байсан уу?

-Дуудлага өгснөөс бид цаг гаруй хугацааны дараа очсон. Цас ороод, хүйтэн байсан болохоор хүмүүс нь даарч, их сандарсан байсан. Тухайн хүмүүс нь самар түүгээд, буцаж явсан юм билээ. Тэднийг гол гарахаас өмнө Ланд-80 маркийн машин голоор зүгээр гараад явчихаар нь дагаж гарах гэж байгаад ийм зүйл болсон гэсэн. Хамгийн гол нь тэд цуварч ороогүй зэрэг ороод суучихсан байна лээ. Хүмүүсийг гаргаж байх явцдаа голын захад гал түлчихсэн байсан болохоор тэд амархан дулаацсан байх. Бараг л гал тэврээд авах нь холгүй байсан шүү. Голд суусан 26 хүний 10 орчим нь эмэгтэй байсан болохоор голоос гараад, бараг уйлаад “Баярлалаа” гэж хэлсэн. Гэхдээ тийм үед эд хөрөнгө яах вэ, хүмүүсийг аюулгүй болгоё л гэх бодол төрж байсан.

-Жаахан удсан бол балрах байжээ?

-Цаг алдсан бол машинууд унах магадлалтай байсан. Манай Үүрийн гол гүнзгий учир аюул их ойрхон байсан. Гэхдээ ямар ч байсан хүмүүсийн амийг аварсандаа баяртай байгаа.

-Та өмнө нь амь аврах ажиллагаанд оролцож байв уу?

-Үгүй ээ, тухайн үед гол дотор машинтайгаа байгаа хүмүүсээс илүү сандарлаа. Яваад очиход маш хүнд байдалтай байсан болохоор бас айлаа. Харин хамт явсан том тэрэгтэй Н.Даваадорж жолооч маань голоос машин ачиж, татаж гаргах үйлчилгээ эрхэлдэг болохоор их туршлагатай байсан. Хэрэв би ганцаараа байсан бол тэднийг яаж ч чадахгүй байх. Тиймээс Даваадорж ахдаа бас баярлалаа гэж хэлье. Мөн энэ жил самар их ургасан учир Эрдэнэбулган сум хөл хөдөлгөөн ихтэй байна. Хөвсгөл аймагт ганцхан манай суманд самар ургадаг болохоор ойролцоогоор одоогийн байдлаар 3000 гаруй хүн самар түүхээр ууланд гарсан байна лээ.

Г.Ширэндэв: Жаахан л цаг алдсан бол голд гацсан 26 хүн машинтайгаа живэх байсан

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 5

Сэтгэгдэл үлдээсэн: 2020-11-04 19:00:28

Batbayr : Hvn jiwchiheer garam bish .ywgan tuulaad garah hemjeenii bolchihson baisan .garam medehgvi.us.gol gj yu baidgiig medehgvi baij bvren bus tehnikeer gol garahaa bolih heregtei.vertei ved bol ta nar sanaltgvi.shuud zagasni hool!!!!!!
Сэтгэгдэл үлдээсэн: 2020-11-04 02:42:34

Baterdene: Арчаагуй жолооч вэ уул усыг судал ийм чадалтай техник арчилж эзэмшиж чадахгуй бол явган явж бай тэр болгон гарчихдад гол биш
Сэтгэгдэл үлдээсэн: 2020-11-04 02:41:12

Baterdene: Арчаагуй жолооч вэ уул усыг судал ийм чадалтай техник арчилж эзэмшиж чадахгуй бол явган явж бай тэр болгон гарчихдад гол биш
Сэтгэгдэл үлдээсэн: 2020-11-03 13:58:10

80: дизель 80 усанд мундаг л да.
Сэтгэгдэл үлдээсэн: 2020-11-02 16:07:03

uuriin goliin hun: tsagdaa zaluud bayarlalaa. harin gantshan manai sumand samar urgadag gesen ni buruu bna, survaljlagch buruu oilgoson baij magad. uuriin gol edgeer humuusiig harj uzej dee. uuriin gol mini buyanaa bidendee hairlaj baigaarai.

Шинэ мэдээ

Нийтлэлчид