Шөнийн 03:00 цаг өнгөрч байхад хаягийнхаа хамаг гэрэлтүүлгийг унтраачихсан Сансарын нэг паб байсхийгээд л гурав, дөрвөөр нь хүн гаргаж байна. Ажиглаж суувал хэдэн хүн гаргаад хаалгаа хааснаас 10-аад минутын дараа дахиад хоёр хүн гаргалаа. Нэлээн согтуу бололтой хоёр эр нэгний сугадан зам руу явж байтал нэг нь гэнэт доош тонгойж байснаа бөөлжчихлөө. Нөгөө нь хэсэг харж зогссоноо жаахан цаашлаад шууд гудамжинд ил бие засаж байх аж.

                       Өнгөрсөн амралтын өдрийн шөнө 02:00 цаг дөхүүлээд Ардын эрхээс гарлаа. Хэдийнэ шөнө дунд болоод нам гүм, эл хуль байх ёстой байсан гудамж, талбай согтуучуудаар дүүрсэн байх аж. Замын хажуугийн сандал дээр хэдэн өсвөр насны хөвгүүд чанга чанга инээлдэн ярьж байх. Дөхөж очоод харвал дундаа хэд хэдэн том пиво тавьчихаад, нууж хааж байгаа ч юм байхгүй ил аягалаад нэгэндээ өгч байна. Хажууханд нь хамт явж байгаа бололтой нэг залуу чанга чанга хашхиран утсаар ярьж байснаа “Пиз... минь чи ир л дээ. Лал..... чинь гарч ирнэ гэж худлаа шаа....д алга болчих юм” гэх. Сандал дээр сууж байсан нэг нь дөхөж очоод “За наадахаа хаячихаач дээ. Май энийг татчих” гээд аягатайгаа өглөө. Замын хойд талд нь мөн л хэдэн залуу хашхирч явна. 20 гаруйхан насны бололтой дөрвөн залуу, дөрвөн эмэгтэй гар утсаараа дуу тавьчихаад нэгнээ налаад л гудмаар чанга чанга дуулаад явах аж.

Хотын төв ч, зах ч ялгаагүй шөнө дундад замын хөдөлгөөний дүрэм үйлчилдэггүй юм байна. Явсан газар болгонд том том яндан тавьчихсан машинууд хаазаа тултал нь гишгэн хотын төвөөр уралдаад, нэгнийгээ мөргөж, осолд орчих шахам явж байх. Зарим гэрлэн дохио унтарчихаад шар нь анивчаад ажиллахгүй. Хаа нэг явган хүн замаар гарахдаа хоёр тал руугаа машин харж байгаад л гүйчихнэ. Бүр зарим нь нөгөө хаазаа тултал нь гишгээд уралдаж байгаа хэдийн машинд мөргүүлчих гээд “Хаая, хүүе” гэсээр зам гарах аж. Шөнийн 02:00 цаг талдаа орж байхад 100 айлын автобусны буудал дээр хүмүүс ид бужигнаж байна. Замын хоёр талын ТҮЦ-үүд нээлттэй. Хүмүүс орж тамхи тариа, ширхгийг хоол зэрэг аваад гарч байна. Сайн харвал 100 айлын буудлаар машинууд эгнээд зогсчихжээ. Олонхынх нь жолооч согтуу гээд дуудлагын жолооч дуудаад хүлээж байгаа юм байна. Харин зарим нь “Согтуучуудыг такси барих нь уу” гээд хүлээж зогсоо гэнэ. ТҮЦ-ийн гадна зогсож байсан хэдэн залуугийн нэг нь “Мань нь шагийн юм дуудчихсан. Удахгүй ирэх байх” гэж хэлээд удаагүй байтал XI хорооллын замаас нэг “Приус-20” давхиж орж ирээд зогсов. Зорчигчийнх нь талаас үүргэвч үүрсэн нэг хүү бууж ирээд, нөгөө залуус дээр очоод цүнхнээсээ архи, пиво гаргаж өгчихөөд явлаа.

-ШӨНИЙН ЗУГАА ЦЭНГЭЛИЙН ТӨВ БУЮУ САНСАР-

Сансар хавиар бүр шөнийн амьдрал ид өрнөж байна шүү. Пабнууд нь хаалгаа барьчихсан харагдах ч хаалгаа дотроос нь түгжчихээд доторх хүмүүсээ хэд хэдээр нь ээлжлэн гаргаж байгаа бололтой. Зарим нь бүр нөгөө пабуудыг андахаа больчихсон, хаалгыг нь балбасаар байгаад нээлгээд ордог юм байна. Сансарын “Пицца хат”-аас урагшхан нэг PC тоглоомын газар байх аж. Гадаа нь хэдэн залуу тамхи татаж байхтай нь таарлаа. Тэгсэн юүдэнтэй залуу нь “Пиз... насаа худлаа шаа....д хонож байгаа шдээ. Баригдаад хөөгдөөд гарвал онигоо шаа... даа” гэхэд нэг нь “Чи царайгаа харуулахгүй л байхгүй юу. Эсвэл би хэлчих үү” гээд нөгөө хэдтэйгээ хамт инээлдэж байгаад орлоо.

                      “Банана” нэртэй баарны гадаа бөөн хүн бужигнаж байна. Үүдэнд нь нэг машины дөрвөн хаалгыг онгойлгоод спикер дээр нь дуу тавьчихжээ. Баарны гадна ч ялгаагүй хүмүүс бүжиглээд чанга чанга хашхирч байх. Хүний хөл болсон “Банана” болон зэргэлдээх хэд хэдэн баарны хажууд шорлогийн бизнес “цэцэглэжээ”. Гурав, дөрвөн хүн шорлог шараад, түүнийгээ нөгөө ид доргиж байгаа хүмүүсийн дунд “Авах уу. Авах уу” гээд барьж гүйдэг юм байна. Онгорхой баарнууд доторх хүмүүсээсээ гаргахтай нь зэрэгцэн зөрж хүмүүс орлоо. Гарч ирсэн хүмүүс хэдэн тийшээ салаад огих нь огьж, бөөлжих нь шууд ил бөөлжчихдөг аж. Дотроос гарч ирсэн хүмүүсийн булан, тохой руу ил бие засаж байгааг ярих юм биш. Бүр ингэж бие засах нь энд хэвийн үзэгдэл болсон бололтой, хэн ч юм хэлсэнгүй.

Түрүүхэн гарч ирсэн хүмүүсээс фракц болж салсан дөрвөн хүн гэнэтхэн хоорондоо муудаад эхэллээ. Дөхөөд очвол 20 гаруй насны хоёр эмэгтэй, нэг залуу, 40 гарч яваа болов уу гэмээр хижээл эр байх. Баарнаас гарч ирсний дараа 40 гаруй насны эр нэг эмэгтэйн биеийнх нь эмзэг хэсэгт хүрсэн гэнэ. Хоёр эмэгтэй нь нөгөө эрэгтэйг түлхээд унагачихсан дээрээс цүнхээрээ цохиж, нулимаад хараалын үг хэлж байна. Харин залуу нь зогсоох гэж байгаа бололтой “За ах хүүг уучлаарай, хоёр оо. Би ч сайн мэдсэнгүй ээ. Ёстой уучлаарай” гэх. Нөгөө хоёр эмэгтэй пиз.., гич... гэх зэрэг баахан хараал уншиж байгаад цааш явлаа. Залуу нөгөө эрийг босгож, хувцсыг нь гөвсөөр үлдэв. Баарнаас урагш яваад байх “CU”-гээс том пиво барьсан хоёр эр гарч ирээд зэргэлдээх өөр хоёр эмэгтэй дээр очин яриа өдөж байна. Саравчтай малгайтай нэг эрэгтэй нь “Би уруул том байгаа биз дээ. Нөгөөх ч гэсэн том шдээ” гэснээ шууд нэг эмэгтэйнх нь бэлхүүсээр тэвэрч авав. Хэсэг хашхираан шуугиан болж байгаад саллаа. Нөгөө хоёр эмэгтэй ум хумгүй зам гараад гүйчихлээ. Эрэгтэй араас нь “Муу хоёр ян..., ги...нүүд” гэж чанга чанга орилох аж.

Шөнө дунд Сансар орчим бүр хараа, хяналтгүй юм болов уу гэвэл бас үгүй. Нөгөө бөөн юм болж байгаа газраас хоёр ч цагдаагийн машин явж өнгөрөх. Тэгэхдээ гадаа ил шээж, бөөлжиж байгаа хүмүүсийг анхаарч, сануулга өгөхгүй юм. Жолоочийн талын цонхоо онгойлгож толгойгоо гаргачихаад “Хөөе, хөөе та нар” гэж хоолойгоо бүдүүн болгож хэлж байгаад явчихлаа.

-ЦАГДААГИЙН ХЭЛТЭСТ-

Баянзүрх дүүргийн цагдаагийн I хэлтэс дээр ачаалал бага байгаа харагдах. Коридорт нь ч хүн алга. Харин гадаа нь хоёр, гурваараа бөөгнөрсөн хүмүүс хоорондоо юм ярин зогсож байна. Тэднээс холгүйхэн цагаан биеийн тамирын хослол өмссөн эрэгтэй утсаар “Мань нь Хан-Уул дээр байсан чинь Баянзүрхийн цагдаа нар бариад шаа....н. Одоо Баянзүрхийн цагдаа дээр байна. Чи манийгаа ирээд авчих” гээд чанга чанга орилж байгаад дотогш орлоо. Гадаа хүн рүү яриад чанга чанга хашхираад байсан залуугаас жижүүр цагдаа нар нь юм асууж байгаад үнэмлэхийг өгөөд гаргачихав.

Тэгсэн гаднаас хувцас хунар нь шороо, тоос болчихсон хоёр согтуу эрэгтэй нэгнийгээ түшсээр орж ирлээ. Нэгнийх нь нүдний дээгүүр, хөмсөг хавиар язарсан бололтой нүүр, энгэр, заам нь цусанд хутгалдчихаж. Жижүүрт гарч байсан цагдаа ирээд нөгөө түшиж орж ирсэн рүү зандарч “Чи одоо нэгнийгээ ийм болтол нь зодчихож байгаа юм уу” гэхэд нимгэн хар куртик, цагаан футболк нь шороо, тоос болчихсон эр гараа сарвагануулан “Үгүй, үгүй. Манай энэ найз бид хоёр хамт ууж байсан юм. Тэгсэн шээх гэж явж байгаад газар шунгаж унаад нүүрээ ийм болгочихлоо” гэв. Тайлбарыг нь сонссон цагдаа ч нэг их юм хэлэлгүй байж байгаад түргэн тусламж дуудав. Түргэн тусламжийн эмч их удалгүй орж ирлээ. Нөгөө хөмсөг нь язарсан эр дээр очоод юм асууж, шалгаатал хариу өгч байгаа юм алга. Сандал дээрээ хэдэн тийш гуйваад уначих гээд болсонгүй. Түргэний тэргийн жолооч бололтой өндөр настай хүн нөгөө согтуу эрийг араас нь түшиж байна. Согтуугийнх нь халуунд болдог юм болов уу, эсвэл өөр аргагүй байсангүй юү. Түргэний эмч нөгөө эрийн нүүрийг нойтон сальфеткаар арчиж байгаад зүү, утас сүвлэн суугаагаар нь хөмсгийг нь оёчихоод явав. Цагдаа ч нэг их анзаараагүй байтал хөмсгөө оёулсан эрийг нь нөгөө нь сугадаад гараад явчихлаа.

-НЭГ Ч ЭРҮҮЛ ХҮНТЭЙ ТААРСАНГҮЙ-

Үүрийн 05:00 цагийн алдад шөнийн турш согтуурсан хүмүүсийн хөдөлгөөн мэдэгдэхүйц багасах аж. Буцах замдаа шөнөжин архидсан бололтой ганц, хоёроороо алхаж яваа хүмүүстэй таарлаа. Бүр зарим нь гудамжинд мэдээ үгүй тасраад уначихаж. Эргээд Сансар хавиар ирэхэд дохиолол бололтой дуу хангинуулсан “Портер” загварын машин хэдэн гудамж дамжин дамжин зогсож, өнөө саяхан хэрэглээнд гараад байсан скүүтерийг ачиж байх. Гүйж очоод асуутал ачиж байсан нэг өсвөр насны хүү “Энд тэнд хаячихсан, алдагдсан скүүтерийг GPS-ээр нь хайгаад олж авч байна аа хө” гээд барьсан скүүтерээ тэвш рүүгээ шидлээ. Скүүтерийг нь зогсоохгүй, заасан талбайгаас нь гаргахаар дохио дуугараад ажиллахаа больчихдог гэнэ. Ийм болсон скүүтерийг тэр хүү, “Портер”-ийн жолооч хоёр GPS-ээс хайж олж аваад, буцаан агуулах руугаа аваачдаг юм байна. Хүүгийн хэлснээр шинэ скүүтер хүмүүсийн зугаа цэнгэл хөөж явахдаа унадаг унаа болсон гэнэ. Аль нэг газрын гадна аваачиж хаячихаад мэдэгддэггүй аж. Үйлчилгээний нөхцөл, дүрэм зөрчөөд дохиолол нь дуугарсан олон скүүтер ачсан “Портер” дараагийнхаа олж авахаар цааш хөдөллөө.

Өглөөний 06:00 цагийн үед сурвалжилгаа дуусгалаа. Шөнийн турш явган явахад олон хүн зөрж өнгөрсөн ч нэг ч эрүүл хүнтэй таарсангүй.