Өчигдөр үд дундын орчимд ажлын машин хүлээнгээ Жуковын автобусны буудал дээр зогсож байлаа. Хотын гудамж эл хуль, цаанаа л түгшүүртэй. Тэгж байтал 40 орчим насны цагдаа дэргэд хүрч ирээд:

  -“Амрыг эрье. Та хаа хүрч явна” хэмээн эелдэгээр асууж байна. Хэдий эелдэгээр боловч энэ түгшүүртэй цаг үед “POLICE” гэсэн бичигтэй хар ноосон малгайтай, амны хаалттай, биерхүү цагдаа “Хаа хүрч явна” гэж асуух тэрхэн агшин нэг л айдастай мэдрэмж төрүүлэх аж. Би ч хэвлэл мэдээллийн салбарт ажилладаг, хагас өдрөөр жижүүрлэж буй тул ажилдаа яваагаа хэлж, ажлын үнэмлэхээ үзүүллээ. Малгай, амны хаалт хоёрынхоо завсраар нүд нь гялсхийж, үнэмлэх, царай хоёрыг тулгаж харснаа “Болгоомжтой яваарай. Маскаа зүүж, гараа ариутгаарай” гэж байна. Хариуд нь “Баярлалаа, та ч бас” гээд саллаа. Машин ч ирж, суугаад хөдлөх үед өнөө цагдаа настайвтар эмэгтэйн тортой юмыг өргөлцөн цааш алхаж буй  харагдсан.

         Өнгөрсөн 10 сар гаруй хугацаанд “КОВИД-19” вирусийн халдвараар 50.3 сая хүн өвчилж, тэднээс 1.3 сая хүн нь хорвоог орхиод байна. Өөрөөр хэлбэл, Улаанбаатар хотын нийт хүн амтай ижил тооны хүн энэ халдвараар нас бараад байна гэсэн үг. Товчхондоо, ямар аюултай цар тахал болох нь эндээс бэлхнээ харагдана. Энэ аюулт цар тахлын үед иргэн бидний үүрэг бол гэртээ байх. Харин дээрх цагдаа шиг биднийг халдвараас хамгаалах, эрүүл байлгах, бас өвчилсөн бол эдгээх амаргүй үүрэгтэй хэдэн мянган хүн байна.

        Цагдаагийн тангарагт:

“Монгол Улсын иргэн би Цагдаагийн албанд ажиллахдаа Монгол Улсын Үндсэн хууль, бусад хууль, алба хаагчийн ёс зүй, сахилга, албаны нууцыг чанд сахин, чин шударгаар ажиллаж, шаардлага гарвал амь биеэ үл хайрлан зүтгэхээ батлан тангараглая. Би энэ тангаргаасаа няцваас хуулийн хариуцлага хүлээнэ”гэж бий. Тэд “Шаардлага гарвал амь биеэ үл хайрлан зүтгэнэ” гэсэн тангарагаа цар тахлын аюул нөмөрсөн энэ үед ийн биелүүлж буй ажээ. Чухамдаа тэд хоёрхон давхар амны хаалтаар бамбай хийгээд “КОВИД-19” гэх аюулт дайсны өөдөөс тэмцэж буй юм.

       Бас “Эмч би:

Эмчийн ёс зүй, төрийн хуулийг чандлан сахиж

Эрдэнэт хүний амь нас, эрүүл мэндийн төлөө

Эрдэм чадал, энэрэх сэтгэлээ харамгүй зориулахаа

Тангараглая Тангараглая Тангараглая” гэж тангараг өргөдөг. Тэд эмчилдэг эм, зориулагдсан вакцин ч гараагүй байхад эмчилнэ, эдгээнэ гэсэн итгэлээр халдварын голомтод гэртээ ч харихгүйгээр ажиллаж буй. Монголын чадварлаг, сэтгэлтэй эмч нар өнгөрсөн хавраас хойш 300 гаруй халдвартай иргэнийг эрүүл саруул болгоод гэрт нь буцаагаад байна. Энэ бол өнөөх л “Эрдэнэт хүний амь нас, эрүүл мэндийн төлөө эрдэм чадлаа харамгүй зориулна” гэсэн тангарагаа үнэнчээр биелүүлж буй хэрэг юм. Тангараг өргөсөн тэд ажлаа л хийж байна гэж ёозгүй харах цөөнх байхад хэцүү цагт өргөсөн тангарагтаа үнэнч байгаад нь “Баярлалаа” гэж хэлэх дийлэнх хэсэг байна. Би л хувьдаа хоёр дахь хэсэгт нь багтана. Тиймээс эмч, сувилагч, асрагч нартаа маш их баярлалаа.

Чухамдаа тэд хоёрхон давхар амны хаалтаар бамбай хийгээд “КОВИД-19” гэх аюулт дайсны өөдөөс тэмцэж буй юм

          Бас аюулын үед хэзээд бэлэн байдаг онцгой байдлын алба хаагчдад, мэргэжлийн хяналтынхандаа баярлалаа. Эх орны дархан хилийн манаанд ч, эрүүл мэндийн энхийн манаад ч үүргээ нэр төртэй гүйцэтгэж буй цэрэг эрсдээ баярлалаа. Хотын булан тохой бүрийг ширхэг ч нянгүй байлгахын төлөө ариутгал халдваргүйжүүлэлт өдөр шөнөгүй хийж буй Зоонозын өвчин судлалын төвийн ажилтнууд, тохижилт, нийтийн үйлчилгээний ажилчдад баярлалаа.

         Халдвартай иргэдийг тээвэрлэх, халдвар тараахаас нь өмнө зогсоох цаг минуттай уралдсан ажилд хүчин зүтгэж буй эрүүл мэндийн салбарын жолооч нарт баярлалаа. Асар их эрсдэл дундах гаднын орнуудаас элэг нэгтнүүдээ татан авчирч байгаа агаарын тээврийн албан хаагчиддаа мөн баярлалаа. Хэзээ мөдгүй халдвар авах эрсдэлтэй ч энгийн өдрүүдийнх шиг ажлаа хийж яваа нийтийн тээврийн жолооч нарт баярлалаа. Мөн тог цахилгаан, ус, дулаан, хүнсээр тасалдуулахгүй хангаж буй дулааны цахилгаан станц, эрчим хүчний салбарын бүх ажилтанд баярлалаа. Дэлхий дахин “Ковид-19” цар тахлаар “халуурч” байхад яаралтай, зөв бодлого, тооцоолол хийж, шуурхай арга хэмжээ авч иргэдээ 10 сар гаруйн хугацаанд халдвараас хамгаалж ирсэн УОК, төр засгийн удирдлагууддаа мөн талархах учиртай.

Мянга мянган хүүхэд “Том болоод эмч, цагдаа эсвэл цэрэг, онцгойгийн аврагч болно” хэмээн мөрөөдөж байгаа. Бас мянга мянган буурал “Тангараг өргөсөн тэднээс муу юм хоолуур байгаасай” хэмээн залбирч, эрхиэ эргүүлэн суугаа биз ээ

         Яг энэ цаг үед тэд л биднийг “КОВИД-19” хэмээх цар тахлаар өвчлүүлэхгүйн төлөө, өвчилснийг нь эдгээхийн төлөө амь үл хайхран тэмцэж байна.

         Бас яг одоо мянга мянган хүүхэд “Том болоод эмч, цагдаа эсвэл цэрэг, онцгойгийн аврагч болно” хэмээн мөрөөдөж байгаа. Бас мянга мянган буурал “Тангараг өргөсөн тэднээс муу юм хоолуур байгаасай” хэмээн залбирч, эрхиэ эргүүлэн суугаа биз ээ.

         Баярлалаа, ард түмнийхээ эрүүл энхийн төлөө нялх үр, хайрт хань, ахан дүүс, эжий ааваа орхиод, эрүүл мэнд, амь насаа үл хайхран идэх хоол, унтах нойроо умартан зүтгэж буй зүрх бүхэнд. Дайраад ирсэн зовлон, бэрхшээл удахгүй арилж, сайхан цаг ирэхэд элэг бүтэн, бүрэн бүтнээрээ жаргалтай, тэнүүн дүүрэн амьдрахын ерөөл өргөе.