Төрийн соёрхолт, дуучин Д.Болд сурагагүй алга болсон гэх мэдээлэл ЦЕГ-ын албан ёсны веб сайтад тавигдсан. Гэтэл дуучин Д.Болд гэртээ байгаа талаараа олон нийтэд мэдээлсэн билээ. Иймд ямар тохиолдолд тухайн иргэнийг эрэн сурвалжлах үйл ажиллагаа явуулдаг талаар ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү мэдээлэл өглөө.

Дуучин Д.Болд цагдаагийн байгууллагад ирж уулзсанаар эрэн сурвалжлах үйл ажиллагаа дууссан

Тэрбээр “Эрэн сурвалжлах үйл ажиллагаа нь иргэний гомдол, шүүхийн байгууллагын захирамж зэрэг олон үндэслэлээр цагдаагийн байгууллага хуулиар хүлээсэн үүргийнхээ хүрээнд явагддаг. Дуучин Д.Болдын тухайд ХУД-ийн шүүхээс иргэний журмаар нэхэмжлэлтэй эрэн сурвалжлах ажлыг цагдаагийн байгууллагад даалгасан. Энэ нь журмынхаа дагуу шүүхээс тухайн хариуцагчийг оршин суугаа хаягтаа байхгүй тохиолдолд эрэн сурвалжлах ажлыг цагдаагийн байгууллагад даалгасан гэсэн үг. Дуучин Д.Болд цагдаагийн байгууллагад ирж уулзсанаар эрэн сурвалжлах үйл ажиллагаа дууссан. Улсын хэмжээнд эрэн сурвалжилж байгаа мэдээлэл эрэн сурвалжлах дотоод сан болон ЦЕГ-ын сайтад  тавигддаг. Үүгээр иргэдээс мэдээ мэдээлэл авдаг байгаа” гэлээ