“Баруун бүсийн эрчим хүчний систем” ТӨХК болон “Увс ЦТС” компанийн 57 хүний бүрэлдэхүүнтэй баг шуурганы улмаас цахилгаан дамжуулах агаарын шугам хугарсныг бүрэн засварлаж, баруун аймгийн хэрэглэгчдийг өнгөрсөн шөнө цахилгаан эрчим хүчинд холбожээ.

Тодрулбал, хүчтэй шуурганы улмаас гуравдугаар сарын 14-нд ОХУ-ын хилээс нааш 10 километр газарт Увс аймгийн Дувст сумын нутаг Хүдэнгийн хөдөөд цахилгаан дамжуулах агаарын шугамын нэг тулгуур хугарч Увс, Ховд, Баян-Өлгий аймгийн эрчим хүч хэрэглэгчид цахилгаангүй болсон. Улмаар Дөргөний усан цахилгаан станц болон дизель эх үүсвэрээр эрчим хүчээ хангаж байсан билээ. Уг гэмтлийг засахаар “Баруун бүсийн эрчим хүчний систем” ТӨХК-ийн 34 инженер, техникийн ажилтан, “Увс ЦТС” компанийн 23 ажилтан нийт 57 хүний бүрэлдэхүүнтэй баг шуурхай ажиллан гэмтлийг богино хугацаанд засварлаж, хэрэглэгчдийг эрчим хүчээр хангалаа. Мөн ОХУ-аас хүчдэл авах захиалга өгчээ.