Онцгой байдлын ерөнхий газар болон Нийслэлийн онцгой байдлын газар гуравдугаар сарын 12-нд 08:00-17:00 цаг хүртэл дотоод сургалт зохион байгуулсан бөгөөд сургалтад оролцсон нэг алба хаагч коронавирусийн халдвар авсан нь тогтоогдож, 20 гаруй хүнийг тусгаарлаад буй. Эдгээр иргэнээс аврах 10 дугаар ангийн хэд хэдэн алба хаагч коронавирусийн халдвар авсан гэх мэдээлэл гараад байна.

Энэ талаар Нийслэлийн онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүйгээс тодруулахад “Гамшгаас урьдчилан сэргийлэх ажлаа өрнүүлэхийн тулд улбар шар түвшний хүрээнд 3D танхимд хүн хоорондын зай баримталж сургалт зохион байгуулсан. 20 алба хаагчдыг тусгаарласан болон алба хаагчаас коронавирус илэрсэн зүйл байхгүй” гэв.

Бэлэн байдлын шар түвшнээс улбар шар түвшинд шилжих шийдвэрийг гуравдугаар сарын 13-нд Шадар сайд С.Амарсайхан мэдээлж, өнөөдөр буюу гуравдугаар сарын 15-наас мөрдөхөөр болсон билээ.