Тусгаарлах байранд нас барсан эмэгтэйн талаар Эрүүл мэндийн сайд С.Энхболд мэдээлэл өглөө. Тэрбээр “Монголика зочид буудалд тусгаарлагдаж байсан 70 настай эмэгтэй нас барсан. Талийгаач Төв аймагт оршин суух хаягтай бөгөөд коронавирусийн халдвартай иргэний ойрын хавьтал болсон. Иймд гуравдугаар сарын 11-нд тус зочид буудалд тусгаарлагдсан. Маргааш нь PCR шинжилгээгээр талийгаач халдвар аваагүй болох нь батлагдсан.

Монголика зочид буудалд тусгаарлагдаж байсан 70 настай эмэгтэй нас барсан

Тусгаарлах байранд ирэх үед СЭМҮТ-ийн эмч талийгаачид үзлэг хийсэн. Үзлэгээр хөнгөн хэлбэрийн ой тогтоолт алдагдалтай, сэтгэцийн өөрчлөлттэй гэсэн дүгнэлт гарсан. Тусгаарлах байранд байрлуулсан шалтгаан бол талийгаач төв аймаг дахь гэртээ ганцаараа амьдардаг. Мөн ойрын хавьтал болсон учир журмын дагуу долоо хоног Монголика зочид буудалд тусгаарласан. Өдөрт 4-5 удаа эмчийн үзлэгт оруулсан ч өчигдөр (2021.03.14) гэнэт нас барлаа. Хэрвээ ар гэрийнхэн нь хүсэлт гаргавал задлан шинжилгээ хийж, нас барсан оношийг эцэслэнэ. Урьдчилсан дүгнэлтээр талийгаач зүрх судасны суурь өвчлөлтэй байх магадлалтай ” гэлээ.