Орос хэлний олимпиадыг энэ оны арванхоёрдугаар сарын 25-нд Оросын шинжлэх ухаан, соёлын төвд зохион байгуулжээ. Тус олимпиадыг Россотрудничество агентлагийн Монгол Улс дахь төлөөлөгчийн газраас санаачилсан бөгөөд Найрамдлын нийгэмлэгүүдийн Монголын эвлэл, Монгол-Оросын найрамдлын нийгэмлэгтэй хамтран ажилласан байна.  

Ховд аймгийн Жаргалант сумын ерөнхий боловсролын хоёрдугаар сургуулийн XII ангийн сурагч Э.Өмүнэгүлсэн, Эрдэнэбүрэн сумын сурагч М.Бадамханд нар амжилттай оролцож, ОХУ-д тэтгэлэгтэй суралцах эрхтэй болжээ6 Тэд ОХУ-ын Засгийн газрын төсвийн хөрөнгөөр 2021-2022 оны хичээлийн жилд Оросын тэргүүлэх аль нэгэн их, дээд сургуульд өөрийн хүссэн мэргэжлээрээ сургалтын төлбөр, тэтгэлэг зэрэг 60 сая төгрөгийн төлбөрөөс чөлөөлөгдөн суралцах юм.  

Гэрчилгээг хорио цээрийн дэглэм буурсны дараа Россотрудничество агентлагийн Монгол Улс дахь төлөөлөгчийн газраас гардуулан өгөх аж. Олимпиадад Монгол Улсын баруун болон төвийн бүсийн аймгуудын ерөнхий боловсролын сургуулийн 40 сурагч оролцож, орос хэлний мэдлэгээрээ өрсөлдсөн байна.