ХӨСҮТ-д өнөөдөр нэг эх амаржиж, Баянзүрх дүүргийн эмнэлэгт зүрхний хүнд өвчтэй, коронавирусийн халдвартай нэг хүн нас барсан талаар ЭМЯ-ны ЭТГ-ын дарга Я.Буянжаргал мэдээллээ. 

Тэрбээр "ХӨСҮТ-д өнөөдөр 22 хүн коронавируст халдвартай  эмчлэгдэж байна. Өглөө 08:20 цагт 30 настай эх амаржиж 3200 гр хүү мэндэлсэн. Эх, хүүхдийн биеийн байдал хэвийн байна.

Түүнчлэн ХӨСҮТ-д 25 настай жирэмсэн эмэгтэй маш хүнд оноштой байна. Халдварын эсрэг эмчилгээ, ураг хамгаалах эмчилгээ хийж байна. Хоёр эмч, зургаан эрүүл мэндийн ажилтан тусламж үзүүлж байна.

Мөн Цэргийн төв эмнэлэгт хоёр хүний биеийн байдал маш хүнд байна. Тэдний нэг нь 56 настай, ковидын халдвар нь эмчлэгдэж эдгэсэн, PCR-ийн шинжилгээ хоёр удаа сөрөг гарсан. Үндсэн онош хүнд байна. 

БЗД-ийн эмнэлэгт нэг хүнд өвчтэй хүн өчигдөр нас барсан. Уг хүн цээжний булчингийн сулрах өвчинтэй, элэгний  С вирусийн архаг үрэвсэлтэй, зүрх судасны дутагдлаар нас барсан. Мөн коронавирусийн халдвартай байсан. Хүнд өвчтэй учраас шилжүүлэх боломжгүй байсан" гэлээ.