Хавдар судлалын үндэсний төвийн 600 гаруй ажилтны 324 ажилтанд шинжилгээ хийхэд урьдчилсан байдлаар коронавирусийн сэжигтэй хоёр тохиолдол илэрсэн тул баталгаажуулах PCR шинжилгээ хийнэ гэж өчигдөр мэдээлсэн. Тэгвэл Хавдар судлалын үндэсний төвийн хоёр эмч коронавирусийн халдвар авсан нь батлагджээ. 

ХӨСҮТ-ийн Тандалт, судалгааны албаны дарга А.Амбасэлмаа "Халдварын сэжигтэй хоёр тохиолдол илэрсэн тул өнөө өглөөнөөс эхлэн тус эмнэлгийн 300 гаруй эмч, мэргэжилтэн, 200 гаруй өвчтөнийг эмнэлэгт нь тусгаарлаж, гаднаас үйлчлүүлэгч авах, үзлэг хийх эмнэлгийн ажлыг зогсоон, хамгаалалтад аваад байна. Хоёр эмч нь гаднаас ирсэн үйлчлүүлэгчээс халдвар авсан байх магадлалтай бөгөөд тус эмнэлэг өчигдөр үйл ажиллагаагаа хэвийн явуулж байсан юм. Эмч, эмнэлгийн ажилтнууд, өвчтөнүүдийг дотор нь тусгаарласан тул эмнэлгийн гал тогоо хоолоор үйлчилж байгаа аж. Халдвар илэрсэн тус эмнэлэг тодорхой хугацаанд гаднаас өвчтөн хүлээн авах боломжгүй учир хавдрын тусламж үйлчилгээг хэрхэн зохицуулах шийдвэрийг Эрүүл мэндийн яамнаас гаргаж, иргэдэд мэдээлэл өгнө” гэлээ.