Эрүүл мэндийн яамнаас цаг үеийн асуудлаар мэдээлэл хийлээ. 2020 оны арванхоёрдугаар сарын 24-нд хийсэн шинжилгээгээр нийт зургаан тохиолдол шинээр батлагджээ. Ингэснээр нийт батлагдсан тохиолдол 1075 болсон байна. 

Халдварын голомтод 2400 хүн ажиллаж байгаа бол зургаан объектын 1800 ам.метр газарт ариутгал халдваргүйтэл хийсэн байна. Мөн ЗӨСҮТ-ийн вирус судлалын лабораторт 4282 хүнд, Авто лабораторит 148 уртын тээврийн жолоочид шинжилгээ хийхэд коронавирус илрээгүй байна.

ХӨСҮТ-ийн Тандалт судалгааны хэлтсийн дарга А.Амбасэлмаа "Өчигдөр 8863 хүн PCR шинжилгээ хийлээ. Үүнээс зургаан хүнээс вирус илэрсэн бөгөөд Баянзүрх дүүргийн Нэгдсэн эмнэлгээс тохиолдол бүртгэгдсэн. Батлагдсан тохиолдол 1075 болж эдгэрсэн 584 хүн байгаа бол эмчлэгдэж байгаа 482 хүн байна. Үүнээс хөнгөн 416, хүндэвтэр 57, хүнд зургаа, маш хүнд гурван хүн байна. Баянзүрх дүүргийн Нэгдсэн эмнэлэгт гарсан голомт маш олон хүнийг хамарсан. Энэ голомтоос гарсан тохиолдол 175 болоод байгаа" гэв.