"Баянзүрх дүүргийн "Амгалан" хотхоны 13 дугаар байрны хаалгыг гаднаас нь гагнасан тул иргэд гарч, орж чадахгүй байна" гэсэн мэдээлэл цахим хуудсанд тархсан. Энэ талаар тус хотхоны СӨХ-ын дарга Б.Уранчимэгээс тодрууллаа.

-"Амгалан" хотхоны 13 дугаар байрны хаалгыг гаднаас нь гагнасан гэдэг мэдээлэл цахимд түгсэн. Энэ үнэн үү?

-Тус байранд коронавирусийн халдвар илэрч иргэдийг гарч, оруулахгүй байна гэх таамаглал тархсан. Тийм шалтгаанаар хаалгыг гагнаж, түгжээгүй. Харин оршин суугчид дотор талын хаалганыхаа чипийг эвдчихсэн учир нэг давхрын айлууд руу хүйтэн орсон болохоор түр арга хэмжээ авч хоёр цүү хадаж хаалганы түгжээг цааш нь түлхэж оруулсан.

-13 дугаар байрыг цагдаа нар хамгаалалтад авсан гэсэн. Тус байрны иргэдээс яагаад зориуд шинжилгээ авч байгаа вэ?

-Тус байрны үүдэнд өчигдөр 10:00 цагийн үед хоёр эмч, хоёр цагдаа ирсэн байсан. Тэднээс юу болсон талаар асуутал “13 дугаар байрны иргэдээс шинжилгээ авах шаардлагатай гэсэн. Гаднын хүн оруулахгүй хэмээн үйлчилгээний хоёр ажилтан бид гурвыг оруулаагүй. Шинжилгээний хариу гарч дуустал байрнаас хүн гаргаж, оруулахгүй” гэж хэлсэн.

-13 дугаар байр хэчнээн айлтай вэ. Өнөөдрийн байдлаар хэчнээн хүнээс шинжилгээ авсан бэ?

-Тус байр 94 өрхтэй. Нэг өрхийн нэг иргэнээс шинжилгээ авч байгаа байх гэж бодож байна. Би 14-р байранд амьдардаг болохоор надад нарийн мэдээлэл өгөхгүй байгаа. Ажлаас ирсэн тус байрны оршин суугчдыг оруулсан. Дотроос хүн гаргахгүй байгаа гэсэн. Өнөөдөр 12:00 цагийн үед 18 өрхөөс шинжилгээ аваад дуусна гэх мэдээлэл утсаар өгсөн. Одоогоор тус байр цагдаагийн хамгаалалтад байгаа.