Мэргэжлийн хяналтын байгууллагын нийт 1400 албан хаагч МХЕГ, НМХГ, 21 аймгийн Мэргэжлийн хяналтын газар, Хилийн боомтуудад Шуурхай штаб болон эргүүл хяналт, тандалт хийн ажиллаж байна.

Улсын хэмжээнд 47 байранд 1877 хүн тусгаарлан ажиглаглалтад байна. Мэргэжлийн хяналтын байгууллагаас тусгаарлан ажиглах байруудад хийгдэж буй хяналт шалгалтаар халдвар хамгааллын дэглэмийн бүсийг тэмдэглээгүй, шар бүсэд хамгаалах хувцас тайлах заавар, толь байрлуулаагүй зөрчил илэрч байна. Орон нутагт зорчсон 49.3 мянган иргэн гэрийн ажиглалтад байгаа аж.

Мөн Эрүүл мэндийн байгууллагуудын бэлэн байдлын хяналт шалгалтыг 25 эмнэлэгт хийж, илэрсэн зөрчлийг газар дээр нь арилгуулжээ.

Шинжилгээ авах 11 цэгт 8392 иргэн шинжилгээ өгсөн. Хяналтаар шинжилгээ авах цэгийн цэвэрлэгээ, халдваргүйжүүлэлттэй холбоотой зөрчил илэрч байна.

Улсын хилээр нэвтрэн орсон 979 тээврийн хэрэгсэл, 939 жолооч, хилээр гарсан 977 тээврийн хэрэгсэл, 948 жолоочид хяналт шалгалт хийж, тээврийн хэрэгслийг халдваргүйжүүлэлтэд хамруулан халдвараас сэргийлж ажиллалаа. Жолооч нарт  халдварын шинж тэмдэг илрээгүй байна.