Монгол хүнийг төлөвшүүлэн, тулхтайгаар сайхан амьдрах чадамжтай болгох боловсролын уламжлалаас сайныг нь хадгалан, орчин цагийн шаардлага, сорилтод нийцүүлэн хөгжлийн төлөө хамтдаа зориулах зорилготой “Монголын боловсролын уламжлан шинэчлэгдэх төв”-ийг өчигдөр нээлээ.

Тус төвийн нээлтэд оролцсон БШУЯ-ны Соёл, урлагийн бодлогын газрын дарга Б.Сэргэлэн “Монгол хүний үнэлэмж, үнэ цэнийг өсгөх гэж оюун ухаанаа уралдуулж буйд баярлалаа. Соён гэгээрэл, урлагийн боловсролыг хөхүүлэн дэмжиж, зөв хүн бий болгохыг хамтатгасан төвийг нээж байгаад баяр хүргэе. Урлагийн боловсролтой болсноор суурь боловсролдоо илүү шамдаж, богино хугацаанд мэдлэг, чадвараа ахиулах хөшүүрэг болдог онцлогтой. Зөв замаар, нэгдсэн бодлоготой яваа учраас энэ төвийн үйл ажиллагаа Монголын боловсролын системд гүүр болж, дэлхийн өнцөг булан бүрд хүрнэ гэдэгт итгэж байна” гэжээ. 

Цаашид энэ төв нь цахимаар сурч буй оюутнуудад холбоо харилцаагаа бэхжүүлэх гүүр болохын зэрэгцээ СЭЗИС-ийн харьяа ахлах сургууль, цэцэрлэгийн хүүхдүүдийг мэргэжлийн урлагийн байгууллага, музейн тоглолт, үзвэр, соёлын хөтөлбөрт хамруулж, Монголын соёл уламжлал, урлагийн үнэт зүйлийг таниулан сурталчлах үйл ажиллагааг СЭЗИС-ийн нээлттэй интерпренер боловсролын төвийн “Монголын иргэншсэн хүмүүн” хөтөлбөрийн хүрээнд хамтран хэрэгжүүлэх юм.

Түүнчлэн бүтээгдэхүүн хөгжүүлэлт, маркетинг, менежментийн чиглэлээр богино, дунд хугацааны алсын зайны сургалт зохион байгуулж соёл, урлагийн салбарын ажилтнуудыг чадавхжуулж, Монголын соёлын бүтээгдэхүүний экспортыг нэмэгдүүлэх чиглэлд төлбөргүй болон хөнгөлөлттэй үнээр зөвлөх үйлчилгээ үзүүлэх зорилготой аж.