Баянхонгор-Алтай чиглэлийн 126.7 км хатуу хучилттай авто замын үлдэгдэл 66.7 км хатуу хучилттай авто замд энэ сарын 19-ний өдөр ажлын хэсэг ажиллаж, байнгын ашиглалтад хүлээн авсан байна. Энэхүү авто замын барилгын ажлыг концессын “барих-шилжүүлэх” гэрээ байгуулж, 2015 онд эхлүүлсэн боловч ажлын явц хангалтгүй байсан тул энэ онд Засгийн газраас шийдвэр гарган, концессын эрхийг “Макс рөүд” ХХК-д шилжүүлсэн. Зам барилгын ажлын гүйцэтгэгч “Макс рөүд” ХХК нь өнгөрсөн  онд эхний 30 км, энэ оны зургадугаар сард дараагийн 30 км хатуу хучилттай авто замыг ашиглалтад хүлээлгэн өгч, 2020 оны аравдугаар сарын 8-ны өдөр үлдэгдэл 66.7 км замын үндсэн ажлыг дуусган, хөдөлгөөний аюулгүй байдлыг хангасны үндсэн дээр тээврийн хэрэгслийн хөдөлгөөнийг нээж байжээ.

Уг зам ашиглалтад орсноор Говь-Алтай, Ховд, Баян-Өлгий аймгууд нийслэл хоттой хатуу хучилттай авто замаар холбогдож эдгээр аймгийн ард иргэд төдийгүй дотоодын болон гадаадын аялагчид, жуулчид тав тухтай, түргэн шуурхай, хямд зардлаар зорчих, байгаль орчны бохирдлыг бууруулах, тээвэр ашиглалтын зардлыг хэмнэх боломжийг нээн өгч, орон нутаг, улс орны нийгэм, эдийн засгийн хөгжилд чухал нөлөө үзүүлэх юм.